පකිස්තානයේ පවතින චීන ආයතන ව්‍යාපෘති සහ එරට තුළ සේවය කරන චීන ජාතිකයන්ගේ ආරක්ෂාව සදහා උපරිම ක්‍රියාමාර්ග ගන්නා ලෙස චීනය අවධාරණය කර තිබේ.
චීන විදේශ අමාත්යාංශයේ විශේෂ නියෝජිතයකු පකිස්තානයට කළ මෙම දැනුම්දීම පිලිබද මාධ්‍ය වෙත අනාවරණය කළේ යැයි විදෙස් වාර්තාවල දැක්වේ.
මෙම අවධාරණය කිරීමට ප්‍රධාන හේතුව පකිස්තානයේ කයිබර් පක්තුන්ක්වාහි කොයිෂ්තාන් ප්‍රදේශයේ දී ඉංජිනේරුවන් ඇතුළු චීන ජාතිකයන් නව දෙනෙකු බස්රථයක සිදුවූ පිපිරීමකින් මියයාමත් සමගයි.
මෙහිදී පකිස්තානුවන් තිදෙනෛකුද මියගිය අතර ඩාසු බලාගාර වැඩබිම වෙත සේවකයන් රැගෙන යමින් තිබූ බස්රථයක් පුපුරායාමෙන් මෙම අනතුර සිදුවිය.
එහිදී පළමුව බස්රථය අනතුරට පත්වී ඇති බවත් ඒ හේතුවෙන් ඉන්දන ටැංකිය පුපුරායාමෙන් අනතුර සිදුව ඇති බවත් පකිස්තාන බලධාරීන් ප්‍රකාශ කර ඇතත් මේ පිළිබද තවදුරටත් පරීක්ෂණ සිදුකරන ලෙස චීනය අවධාරණය කර තිබේ.
මේ අතර මෙම සිදුවීමෙන් අනතුරුව පකිස්තානයේ චීන තානාපති කාර්යාලය පකිස්තානයේ සිටින චීන ජාතිකයන්ට දැනුම් දී ඇත්තේ අතවශ්‍ය කරුණකට හැර තම සේවා ස්ථාන සහ නවාතැන්වලින් බැහැරව නොයන ලෙස හා උපරිම ආරක්ෂක ක්‍රියාමාර්ග සලසා ගන්නා ලෙසයි.
