ඕස්ට්‍රේලියාව තුළ පවතින නිදහසේ අධ්‍යාපන ලැබීමට ඇති අයිතියට බාධා කිරීමට චීන බලධාරීන් කටයුතු කරන බවට හියුමන් රයිට්ස් වොච් සංවිධානය චෝදනා කරයි.
එම සංවිධානය පෙන්වා දෙන්නේ චීනයේ සහ හොංකොංහි සිට ඕස්ට්‍රේලියාවට පැමිණ අධ්‍යාපනය ලබමින් සිටින සිසුන්ගේ අයිතිවාසිකම් මර්දනය කිරීමට චීන බලධාරීන් කටයුතු කර ඇති බවයි.
අදාළ සිසුන් ඕස්ට්‍රේලියාවට පැමිණ අධ්‍යාපන ලබද්දී ට්විටර් වැනි සමාජ මාධ්‍ය ගිණුම් විවෘත කර නිදහසේ දේශපාලන අදහස් පළකරමින් කටයුතු කරද්දී චීන බලධාරීන් එම සිසුන්ගේ ඥාතීන්ගෙන් ඒ පිළිබදව ප්‍රශ්න කර තිබෙනවා.
මේ හැරෙන්නට ඕස්ට්‍රේලියාවේ වෙසෙන චීන රජයට හිතවත් පාර්ශවයන් අදාළ සිසුන්ට විවිධ තර්ජන සහ අඩන්තේට්ටම් කරන බවටද හියුමන් රයිට්ස් වොච් සංවිධානය චෝදනා කරනවා.
චීනයේ මෙම හැසිරීම ඕස්ට්‍රේලියාවේ පවතින අධ්‍යාපන නිදහස උල්ලංඝනය කිරීමක් බව සදහන් කරන හියුමන් රයිට්ස් වොච් සංවිධානය වැඩිදුරටත් පෙන්වා දී ඇත්තේ මෙම තත්වය පාලනය සදහා ඕස්ට්‍රේලියාවද ප්‍රමාණවත් පියවර ගෙන නොමැති බවයි.
