ඇමරිකානු හමුදා ඇෆ්ගනිස්තානයෙන් ඉවත් කර ගැනීමෙන් පසු මතුවිය හැකි අනාරක්ෂිත තත්වයට මුහුණදීම සඳහා මධ්‍යම ආසියානු රටවල් සමඟ වන සබදතා වර්ධනය කර ගැනීමට චීනය තීරණය කර ඇතැයි වාර්තා වේ.
පසුගියදා චීන විදේශ අමාත්‍යවරයා සහ මධ්‍යම ආසියානු රටවල්වල නියෝජිතයන් අතර පැවති සමුලුවකදී මෙසේ ආරක්ෂක ඇතුලු වෙනත් සබදතා තරකර ගැනීම පිලිබද දීර්ඝ ලෙස සාකච්ඡා වී තිබේ.
අදාළ සමුලුවට චීනය සමග තජිකිස්තානය, තුර්ක්මේනිස්තානය, කසකස්තානය, කිර්ගීස්තානය සහ උස්බෙකිස්තානය යන රටවල නායකයෝ සම්බන්ධ වූහ.
සැප්තැම්බර් මස 11 වනදා ඇමරිකානු හමුදා ඇෆ්ගනිස්තානයෙන් සම්පූර්ණයෙන්ම ඉවත් කර ගැනීමට නියමිත අතර ඉන් පසු ඇෆ්ගනිස්තානය, පකිස්තානය ඇතුලු චීනයේ නව සේද මාවත ව්‍යාපෘතියට සම්බන්ධ කලාපයේ අනාරක්ෂිතභාවය වර්ධනය වනු ඇතැයි විශ්වාස කෙරේ.
මේ තත්ත්වය හමුවේ විකල්ප වෙළෙද පහසුකම් කලාපයක් ලෙසත් ආරක්ෂක ක්‍රියාමාර්ගයක් ලෙසත් චීනය මධ්‍යම ආසියානු රටවල් සමග සබදතා තර කර ගැනීමට කටයුතු කරන බව සදහන් වේ.
