යුක්‍රේනයට එරෙහි යුද්ධය හේතුවෙන් බටහිර සම්බාධක එල්ල වීම මධ්‍යයේ බිඳ වැටෙමින් පවතින රුසියානු ගුවන් සේවා අංශයට තවත් පහරක් එල්ල කරමින් චීනය ද රුසියාවට ගුවන් යානා කොටස් සැපයීම ප්‍රතික්ෂේප කර ඇතැයි වාර්තා වෙනවා.
රුසියානු ප්‍රවෘත්ති ඒජන්සියක් වන Interfax වාර්තා කර ඇති පරිදි චීනය ගුවන් යානා කොටස් සැපයීම ප්‍රතික්ෂේප කිරීමෙන් පසු රුසියානු ගුවන් ප්‍රවාහන ඒජන්සිය වන Rosaviatsiya විසින් ගුවන් යානා කොටස් ලබා ගැනීම සඳහා විවිධ විකල්ප සලකා බලමින් සිටියි.
ඒ අනුව රුසියාව ගුවන් යානා කොටස් සපයා ගැනීම සඳහා ඉන්දියාව සහ තුර්කිය ඇතුළු වෙනත් රටවල්වලින් ආධාර ලබා ගැනීම පිළිබඳ සලකා බලමින් සිටින බවයි වාර්තා වෙන්නේ.
රුසියානු ගුවන් සමාගම් විසින් භාවිත කරන ගුවන් යානා බොහොමයක් බෝයිං සහ එයාර්බස් යන සමාගම් විසින් නිෂ්පාදනය කරන අතර යුක්‍රේන ආක්‍රමණයට ප්‍රතිචාර වශයෙන් රුසියාවට ගුවන් යානා අමතර කොටස් සැපයීම නතර කළ බව එම සමාගම් මේ මස මුල දී නිවේදනය කර තිබුණා.මෙම සමාගම්වලට අමතරව ගුවන්සේවා ක්ෂේත්‍රයේ තවත් බොහෝ සමාගම් රට සමඟ ඇති සබඳතා නතර කර ඇති බවයි පැවසෙන්නේ.
මේ අතර බටහිර රටවල් විසින් පනවා ඇති සම්බාධකවලට පළිගැනීමක් ලෙස රුසියාව මේ වන විට ගුවන් යානා සහ ඩ්‍රෝන යානා අපනයනය තහනම් කර ඇතැයි සඳහන් වෙනවා.
