මිනුවන්ගොඩ බ්‍රැන්ඩික්ස් ආයතනයට කොවිඩ් පැමිණි ආකාරය පිළිබඳ අපරාධ පරීක්ෂණ දෙපාර්තමේන්තුව කළ මූලික පරික්ෂණයේ වාර්තාව මේ වන විට නීතිපතිවරයාට භාරදී ඇතැයි සෞඛ්‍ය ඇමැති පවිත්‍රා වන්නිආරච්චි පාර්ලිමේන්තුවේදී පැවසීය.
ඒ නොවැම්බර් 25 වන දින පාර්ලිමේන්තුවේදීය.
මේ පිළිබඳ අපරාධ පරික්ෂණ දෙපාර්තමේන්තුවේ පුළුල් පරික්ෂණ වාර්තාව ලැබුණු පසු එය පාර්ලිමේන්තුවට ඉදිරිපත් කරන බවද ඇමැතිවරිය පැවසීය.
කොවිඩ් වසංගතය මෙරට වාර්තා වීමෙන් පසුව රජයේ රෝහල් පද්ධතියට ප්‍රදානයන් ලෙස සහ රජය මිල දී ගත් පීසීආර් යන්ත්‍ර, වෙන්ටිලේටර් සහ දැඩි සත්කාර ඒකක ඇඳන් කොපමණ දැයි යන ප්‍රශ්නයටද විපක්ෂ නායකවරයා සෞඛ්‍ය අමාත්‍යවරියගෙන් විමසා තිබුණි. එයට පිළිතුරු දෙමින් ඇමතිවරිය පවසා සිටියේ රජයේ රෝහල්වල පීසීආර් යන්ත්‍ර 34 ක් සහ වෙන්ටිලේටර් 1020 ක් ඇතැයිද දැඩි සත්කාර ඒකකයේ ඇඳන් 704 ක් තිබෙන පැවසීය.
කොවිඩ් වසංගතයෙන් පසු පීසීආර් යන්ත්‍ර 25 ක්, ජංගම වෙන්ටිලේටර් 220 ක් සහ දැඩි සත්කාර ඒකක ඇඳන් 61 ක් රෝහල්වලට එකතු කළ බව කී ඇමැතිවරිය පළමු වටයේදීම කොවිඩ් එන්නත් ලක්ෂ 42 ක් ලැබීමට නියමිත බව ද ඒවා දැනට තුන්වැනි සායනික අවධියේ පවතින බවත් පැවසීය.
