ඊශ්රායල් රැකියා සඳහා යවන බව පවසමින් පුද්ගලයන් 40ගෙන් පමණ රුපියල් කෝටි 11 ක පමණ මුදලක් ලබාගෙන වංචා කළ බව කියන සිද්ධියකට කටුනේරියේ නිවසකට කඩා වැදුණු 25 දෙනකුගෙන් පමණ යුත් පිරිසක් මුදල් ඉල්ලා කලබල කළ බව මාරවිල පොලිසිය පවසනවා.
දැනට වසරකට පමණ පෙර සිට ඉඩම් උගස්කර හා විවිධාකාරයෙන් ණයට ගෙන රුපියල් ලක්ෂ 25,35, 45,55 ආදි වශයෙන් මෙම මුදල් ලබා දුන් පවසන ඔවුන්, කොළඹ දූෂණ වංචා විමර්ශන මූලස්ථානයටද පැමිණිලි කර ඇති බවයි සඳහන් වන්නේ.
නිවසේ සිටි මුදල් ගත් බව කියන තරුණයා පැවසුවේ තමා මීට පෙර කීපදෙනකු රට රැකියාව යැවීමට කටයුතු කළ බවත්, මෙවර මුදල් එකතු කර ඇත්තේ වෙනත් කාන්තාවක් බවත්, යැවීමට නොහැකි වූ පිරිසකගේ මුදල් කොටසක් තමා මීට පෙර අවස්ථාවක ගෙවූ බවයි.
මුදල් ලබාගත් බව කියන ආනමඩුව, ආඩිගම ප්රදේශයේ සිට මෙහි පැමිණි කාන්තාව පවසා ඇත්තේ මුදල් නිවෙස් හිමියාට දුන් බවයි.
