ලොව පුරා මෙතෙක් සිදුවූ කොරෝනා මරණ සංඛ්යාව මිලියන 3 ඉක්මවා ගිය බව ඇමරිකාවේ ජෝන් හොප්කින්ස් විශ්ව විද්යාලය නිවේදනය කරනවා.
එම නිවේදනයට අනුව ලොවපුරා මෙතෙක් වාර්තා වූ කොරෝනා අසාදිතයින් සංඛ්යාව මිලියන 140 කට ආසන්නයි.
කෙසේ වෙතත් ලොව පුරා රටවල් සියල්ල සත්ය දත්ත වාර්තා නොකරන බැවින් මෙම දත්ත මීට වඩා වැඩි විය හැකි බවද එම වාර්තාව ප්රකාශ කරනවා.
මේ වන විටත් ලොව පුරා වාර්තා වන කොරෝනා රෝගීන් හා මරණ සංඛාව භයානක වේගයකින් අඛණ්ඩව ඉහළ යන බව ලෝක සෞඛ්ය සංවිධානය ප්රකාශ කරනවා.
සතියකදී වාර්තා වන නව රෝගීන් සංඛ්යාව පසුගිය මාස දෙක තුළ දෙගුණ වී ඇති බවත් මේවන විට ලෝකය රෝගීන් වාර්තාවීමේ ඉහළම මට්ටමට ලඟා වී ඇති බවත් එම සංවිධානය වැඩි දුරටත් ප්රකාශ කරනවා.
මේ අතර අර්බුදයේ බරපතලම තත්ත්වයට ඉන්දියාව මුහුණ දෙමින් සිටිනවා.
කොරෝනා දෙවන රැල්ලට මුහුණ දෙන ඉන්දියාවෙන් පසුගිය සෙනසුරාදා පමණක් නව රෝගීන් 230,000 වාර්තා වුණා.
සති කිහිපයකට පෙර, දිනකට රෝගීන් 20,000 පමණ දක්වා තත්ත්වය පාලනය කර තිබුණත් මේ වන විට එරට සෞඛ්ය අංශ රෝගීන් සඳහා ඇඳන් හා ඔක්සිජන් හිඟයකට මුහුණ දී සිටිනවා.
රට තුල ඖෂධ හිඟයක්ද මතුවී ඇති අතර මේ වනවිට සාමාන්ය මිලට වඩා පස් ගුණයක කලු කඩ මිලට බෙහෙත් විකිණෙන බව ඉන්දියානු මාධ්ය වාර්තා කරනවා.
එක්සත් ජනපදය, ඉන්දියාව හා බ්රසීලය මේ වන විට දරුණුම තත්ත්වයට මුහුණ දෙන රටවල් වන අතර එම රටවල් තුනේ පමණක් මරණ එකතුව මිලියනයකට වඩා වැඩි බවයි වාර්තා වෙන්නේ.
කැනඩාවෙන්ද පසුගිය සතියේ එක්සත් ජනපදයට වඩා මිලියනයක රෝගීන් වාර්තා වුණා.
මේ අතර ලොව පුරා රටවල් 165 ක් කොරෝනා එන්නත් මාත්රා මිලියන 860 ට වඩා ලබා දී ඇති බවට වාර්තා පලවනවා.
එහෙත් රටවල් අතර එන්නත සමානව බෙදී ගොස් නොමැති බව එක්සත් ජාතීන්ගේ සංවිධානය ප්රකාශ කරනවා.
කෙසේ වෙතත් ඉහළ එන්නත් අනුපාතයක් ලබා දී ඇති බ්රිතාන්යය, ඊශ්රායලය වැනි රටවල කොරෝනා රෝගීන් වාර්තා වීම සීඝ්රලෙස පහත වැටී තිබීමද විශේෂත්වයක්.
– තිලාන් ජයසේකර –