අවම වශයෙන් සති තුනක කාලයකට හෝ රට වසාදමන්න යැයි ආණ්ඩුවේ හවුල්කාර පක්ෂ නායකයින් කිහිප දෙනෙකු ජනාධිපතිවරයාට ලිපියක් යොමුකර තිබෙනවා.
කොවිඩ් වසංගතය හමුවේ රට මුහුණ දී ඇති අභියෝගය ජයගැනීම යන මැයෙන් ජනාධිපතිවරයාට යොමුකල මෙම ලිපිය කරුණු 7 කින් සමන්විත වනවා.
අදාළ ලිපිය මගින් ඔවුන් පවසා ඇත්තේ මේ වන විට පවතින ආර්ථික අර්බුදය ගැන තමන් දැනුවත් නමුත් මේ මොහොතේ රට අගුළු දැමීම අත්‍යාවශ්‍ය බවයි.
අවම වශයෙන් සති තුනක කාලයකට රට අගුළු දැමීමකින් තොරව කොවිඩ් රෝගීන් සංඛ්‍යාව රෝහල්වලට දැරිය හැකි මට්ටමට පහත හෙලීමට නොහැකි වන බව එම ලිපියේ සදහන්.
මීට පෙරද රට අගුළු දැමූ අවස්ථාවේදී කොවිඩ් රෝගීන් ගණන පහත වැටුණු ආකාරයද ඔවුන් මෙම ලිපිය මගින් ජනාධිපතිවරයාට සිහිපත්කර තිබෙනවා.
පූජ්‍ය අතුරලියේ රතන හිමි, වාසුදේව නානායක්කාර, තිස්ස විතාරණ, විමල් වීරවංශ, උදය ගම්මන්පිල, ඒ.එල්.එම්.අතාවුල්ලා, ටිරාන් අලස්, ජී. වීරසිංහ, අසංක නවරත්න හා ගෙවිදු කුමාරතුංග යන පක්ෂ නායකයින් මෙම ලිපියට අත්සන් තිබෙනවා.
