කොවිඩ් වසංගතය පාලනය වී ඇතැයි වැරදි වැටහීමක් ඇතිකර නොගත යුතු බව අමාත්‍ය චන්න ජයසුමන මහතා පවසනවා.
ඒ ඊයේ (01) දින රූපවාහිනී නාලිකාවක් වෙත ප්‍රකාශයක් කරමින්.
සංචරණ සීමා ලිහිල් කර ඇති නමුත් වසංගතය පාලනය වී ඇති බවක් හෝ ඩෙල්ටා ප්‍රභේදයෙන් ඇති අවදානම පහව ගොස් ඇති බවක් එයින් ගම්‍ය නොවන බවයි ඔහු පෙන්වා දෙන්නේ.
එබැවින් සීමා ලිහිල් කිරීමන් අනිසි ප්‍රයෝජන නොගන්නා ලෙස ඔහු ජනතාවගෙන් ඉල්ලා සිටිනවා.
“අද දිනයේ සිට සංචරණ සීමා ලිහිල් කරලා තියෙන්නෙ ඇත්තටම රාජ්‍ය සේවයේ කටයුතු අඛණ්ඩව ක්‍රමානුකූලව කරගෙන යෑමට. ඒකෙන් වැරදි වැටහීමක් කිසිකෙනෙක් ඇතිකරගන්න නරකයි කොවිඩ් වසංගතය පාලනය වෙලා තියෙන්නෙ, ඩෙල්ටා ප්‍රභේදයේ ප්‍රශ්නයක් නැහැ කියලා.
ඇත්තටම ඒ පිළිබඳ ලොකු අවදානමක අප සිටින්නේ. නමුත් මේ රට යම් ආකාරයකට විවෘත කරලා තියෙන්නෙ සංචරණ සීමා ලිහිල් කරලා තියෙන්නෙ ජනතාවගේ පහසුව සඳහා රාජ්‍ය සේවය තවත් කාර්යක්ෂම කරලා ජනතාවට සේවය ලබාදෙන්න. හැබැයි ඒකෙන් අනිසි ප්‍රයෝජන ගන්න හදන්න එපා.
ඒක වැරදියට පාවිච්චි කළොත් එහෙම අපට තව සති දෙක තුනක් යනකොට ලොකු ප්‍රශ්නෙකට මුහුණ දෙන්න වෙන්න පුළුවන්. ඒක නිසා කාරුණිකව ඉල්ලා සිටිනවා සියලු දෙනාගෙන්ම බුද්ධිමත්ව කටයුතු කරන්න කියලා මේ වෙලාවෙ”
