මිනුවන්ගොඩ බ්‍රැන්ඩික්ස් ආයතනයේ කොවිඩ් පොකුර නිර්මාණය වුයේ කෙසේදැයි යන්න විමර්ශනයට සහභාගීවූ අපරාධ පරික්ෂණ දෙපාර්තමේන්තුවේ නිලධාරීන් විසි දෙනකුටද කොවිඩ් වැලඳී ඇති බව මහජන සාමය පිළිබඳ ඇමැති සරත් වීරසේකර දෙසැම්බර් (07 වැනිදා) පාර්ලිමේන්තුවේදී පැවසීය.
නීතිපතිවරයාගේ උපදෙස් මත කොළඹ අපරාධ කොට්ඨාසය මෙම විමර්ශන කටයුතු ආරම්භ කර දින දෙකක් ගත වෙද්දී එම නිලධාරීන් හැත්තෑ දෙනෙකුට කොවිඩ් ආසාදනය වූ බව ඇමැතිවරයා කීවේය. මේ නිසා එම විමර්ශන කටයුතු අපරාධ පරික්ෂණ දෙපාර්තමේන්තුවට භාර දුන් බව කී ඇමැතිවරයා බ්‍රැන්ඩික්ස් ආයතනයේ පුද්ගලයන් 100කගේ ප්‍රකාශ සටහන් කර ගනිද්දී එම කටයුත්ත කළ නිලධාරීන් විසි දෙනකුද කොවිඩ් ආසාදිතයන් බවට පත්වූ බව ඒ මහතා පැවසීය.
බ්‍රැන්ඩික්ස් ආයතනයේ සේවකයන් 1500 ක පමණ පිරිසකට කළ පීසීආර් පරික්ෂණවලින් 400 කට පමණ කොවිඩ් 19 වෛරසය ශරීරගතව නැති බවට හඳුනාගෙන ඇති බවත් ඔවුන්ට කොවිඩ් වැලඳී සුවපත්වූ අයදැයි සොයා බැලීමට ඇන්ටිජන් පරික්ෂණ කිරීමට කටයුතු කරන බවත් ඒ මහතා පැවසීය.
බ්‍රැන්ඩික්ස් ආයතනයේ විදේශිකයන් 7 දෙනකු සේවය කරන බවත් ඉන් එක් අයෙකු එංගලන්තයට ගොස් යළි පැමිණ නිරෝධායනය වී ඇතැයිද, ඉන්දියාවේ විශාකාපට්න්ම් සිට පැමිණි සේවකයන් 343 දෙනකුගෙන් 10 දෙනකුට කොවිඩ් වැලඳී තිබූ බව මේ දක්වා කළ විමර්ශනවලින් අනාවරණය වී ඇතැයිද වීරසේකර පැවසීය.
අනුර කුමාර දිසානායක මන්ත්‍රීවරයා අසන ලද ප්‍රශ්නයකට පිළිතුරු දෙමින් වීරසේකර මහතා මේ බව පැවසීය.
