අග්‍රාමාත්‍ය ආරක්ෂකයන් අතරින් කොවිඩ්-19 ආසාදිතයන් හමුවී ඇති බව සහ දැනට අග්‍රාමාත්‍ය කාර්යාලයේ සේවය කිරීම සඳහා අත්‍යාවශ්‍ය නිලධාරීන් පිරිසක් පමණක් ගෙන්වන බව අග්‍රාමාත්‍ය කාර්යාලය නිවේදනයකින් පිළිගෙන තිබේ.
ඒ අග්‍රාමාත්‍ය කාර්යාලය ‘ලොක්ඩවුන්’ කර ඇතැයි සඳහන් පුවත් ප්‍රතික්ෂේප කරමින් එම කාර්යාලයේ මාධ්‍ය ලේකම් රොහාන් වැලිවිට මහතා නිකුත් කර ඇති නිවේදනයකින්ය.
ඒ අනුව කොවිඩ්-19 රෝගය ඇතැයි තහවුරු වී ඇත්තේ අරලියගහ මන්දිරය අභ්‍යන්තරයේ රාජකාරී කරන ආරක්ෂක නිලධාරීන්ට නොව බාහිරව සේවය කරන නිලධාරීන්ට පමණක් බව එම නිවේදනයෙහි සඳහන් කර තිබේ.
අග්‍රාමාත්‍ය කාර්යාලය ලොක්ඩවුන් කර නොමැති බවත් අත්‍යාවශ්‍ය නිලධාරීන් සේවය කරන බවත්, බැසිල් රාජපක්ෂ මහතාගේ ප්‍රධානත්වයෙන් යුත් ජනාධිපති කාර්ය සාධක බලකායේ නිලධාරීන්ද ඒ අතර සිටින බවත් එම නිවේදනයෙහි සඳහන්ය. ඒ අනුව සේවකයන් පිරිසකට සේවයට නොපැමිණෙන ලෙස දැනුම් දී තිබෙන බව තහවුරු වේ.
නොවැම්බර් 22 සන්ඩේ ටයිම්ස් පුවත්පතේ දේශපාලන තීරුවෙහි අග්‍රාමාත්‍ය කාර්යාලයේ සේවකයන්ට සේවයට නොපැමිණෙන ලෙස දැනුම් දී ඇති බව සහ අග්‍රාමාත්‍ය ආරක්ෂක නිලධාරීන්ට කොවිඩ්-19 වැළඳී ඇති බව වාර්තා කර තිබුණි. තීරුවේ සඳහන් කරුණුවලින් කොටසක් උක්ත අග්‍රාමාත්‍ය කාර්යාල නිවේදනයෙන් තහවුරු වී තිබේ.
එසේ වුණත් එම තීරුවේ උප සිරස්තලයක සඳහන් වූ අග්‍රාමාත්‍ය කාර්යාලය ‘ලොක්ඩවුන්’ කර ඇති බවට වන කරුණ අග්‍රාමාත්‍ය කාර්යාලය එම නිවේදනයෙන් ප්‍රතික්ෂේප කර ඇත.
