මෙවර 42 වැනි ජාතික යෞවන සම්මාන උළෙලට සමගාමීව පැවැත්වුණු 9 වැනි යෞවන චිත්‍රපට උළෙලේ වාර්තා චිත්‍රපට අංශයේ හොඳම වාර්තා චිත්‍රපටය ලෙස අරවින්ද වන්නිනායක අධ්‍යක්ෂණය කළ “දවසක්” වාර්තාමය චිත්‍රපටය සම්මානයට පාත්‍ර වුණා.
9 වැනි යෞවන චිත්‍රපට උළෙලේ වාර්තා චිත්‍රපට අංශයට අයත් සම්මාන හයම “දවසක්” වාර්තාමය චිත්‍රපටයට හිමිවීම විශේෂත්වයක්.
එහි දී “දවසක්” වාර්තාමය චිත්‍රපටයේ තිර පිටපත රචනා කරනු ලැබූ බුද්ධික සමන් ගුණවර්ධන හොඳම තිරපිටපතට හිමි සම්මානය දිනා ගත් අතර හොඳම අධ්‍යක්ෂණය සහ නිෂ්පාදනයට හිමි සම්මාන අරවින්ද වන්නිනායක විසින් දිනාගනු ලැබුවා.හොඳම කැමරාකරණය “දවසක්” වාර්තාමය චිත්‍රපටයට කැමරාකරණයෙන් දායක වූ ප්‍රභාත් වික්‍රමසිංහ විසින් දිනා ගනු ලැබූ අතර හොඳම සංගීත අධ්‍යක්ෂණය “දවසක්” සංගීත අධ්‍යක්ෂණය කළ මිලින්ද තෙන්නකෝන් වෙත හිමි වුණා.හොඳම සංස්කරණයට හිමි සම්මානය ද “දවසක්” සංස්කරණය වෙනුවෙන් දායක වූ නිලාන් පී. ජයරත්න විසින් දිනා ගනු ලැබුවා.
“මුළු ජීවිතයම එක දවසක්” යන තේමාවෙන් නිර්මාණය කළ දවසක් වාර්තාමය චිත්‍රපයට සැඳෑ සමයට ප්‍රවිශ්ඨ වන වයෝවෘද්ධ ප්‍රජාවගේ ජීවිතවල අවින්ශ්චිත ඉරණම පිළිබඳ සංවේදී සමාජ ප්‍රස්තුතයක් තේමා වුණා.
ජාතික තරුණ සේවා සභාව විසින් සංවිධානය කළ 42 වැනි ජාතික යෞවන සම්මාන උළෙල පසුගිය 26 වැනි දා කොළඹ නෙලුම් පොකුණ මහින්ද රාජපක්ෂ රඟහලේ දී උත්කර්ෂවත් ලෙස පැවැත්වුණේ තරුණ හා ක්‍රීඩා ඇමති නාමල් රාජපක්ෂ මහතාගේ ප්‍රධානත්වයෙනි.
