සුපිරි පාපන්දු ක්‍රීඩක ඩියාගෝ මැරඩෝනා හෘදයාබාධයකින් මියගොස් තිබේ.
මියයන විට ඔහුගේ වයස අවුරුදු 60 කි.
ඔහුගේ නිවසේදී හටගත් හෘදයාබාධ තත්ත්වයක් නිසා මීට පෙර අවස්ථාවකද මැරඩෝනා රෝහල් ගතකෙරුණා.
ඉන් අනතුරුව පසුගිය සතියේ යළිත් ඔහු රෝහල් ගත කෙරුණේ මොළයේ ඇති රුධිර කැටියක් ඉවත් කිරීමේ සැත්කමකට භාජනය කිරීමටයි.
මෙතෙක් ලොව බිහිවූ විශිෂ්ඨතම පාපන්දු ක්‍රීඩකයෙකු ලෙස සැලකෙන මැරඩෝනා 1986 දී ආර්ජන්ටිනාවට පාපන්දු ලෝක කුසලානය දිනා ගැනීමට මහඟු දායකත්වයක් ලබාදුන්නා.
එය ඔහුගේ පාපන්දු දිවියේ විශිෂ්ටතම හා උච්චතම අවස්ථාවයි.
නමුත් අධික ලෙස මත්පැන් හා මත්ද්‍රව්‍ය භාවිතා කල නිසා ඔහුගේ ක්‍රීඩා දිවිය මෙන්ම පෞද්ගලික ජීවිතයද මතභේදකාරී එකක් වුණා.
මැරඩෝනා විශ්‍රාම ගැනීමෙන් පසුවත් අවස්ථා කිහිපයකදී රෝහල් ගත කෙරුණා.
2000 වසරේදී කොකේන් පානය කිරීම හේතුවෙන් හටගත් හෘදයාබාධ තත්ත්වයක් හේතුවෙන් ඔහු මියයෑමට ඉතා ආසන්නව සිටියා.
2005 වසරේදී ශරීරයේ බර අඩුකරගැනීම සදහා මැරඩෝනා ආමාශයික බයිපාස් සැත්කමක් කල අතර ඉන් වසර දෙකකට පසුව නැවත වරක් මත්පැන් මගින් ඇතිවන හෙපටයිටීස් රෝගයටද ගොදුරු වුණා.
