විවිධ චෝදනා මත රාජසන්තක කෙරුණු වාහන 435 කින් වාහන 133 කට අදාළ රේගු විමර්ශන ලිපි ගොනු අස්ථානගතව ඇතැයි ජාතික විගණන කාර්යාලය නිකුත් කළ වාර්තාක් මඟින් අනාවරණය වී තිබෙනවා.
රාජසන්තක කෙරුණු වාහන සහ බහාලුම් වෙන්දේසි හෝ අපහරණය කරන තෙක් රේගු අධීක්ෂණයේ රඳවා ගැනීම සඳහා ශ්රී ලංකා රේගුව පෞද්ගලික ආයතනයකින් ගිවිසුම්ගතව ලබාගත් වර්ග අඩි 18,000 ක අංගනයක මේ වසරේ ජනවාරි 31 දක්වා වාහන 435ක්ද බහාලුම් 91 ක්ද රඳවා තිබුණ බව එම වාර්තාව පෙන්වා දෙනවා.
විගණන අංශ පවසන්නේ විවිධ වාහන 261 ක් සහ බහාලුම් 86 ක් වසර පහකට අධික කාලයක සිට එම භූමියේ රඳවා තිබුණු අතර මෙම වාහන සහ බහාලුම් රැඳවීම සඳහා යොදාගත් භූමිය වෙනුවෙන් ශ්රී ලංකා රේගුව එම භූමිය අයිති පෞද්ගලික ආයතනයට රුපියල් කෝටි 8 කට ආසන්න අධික කුලී මුදලක් ගෙවා ඇති බවයි.
වසර පහකට අධික කාලයක සිට ගාල්කර ඇති මෙම වත්කම් සම්බන්ධයෙන් කඩිනමින් විධිමත් ක්රියාමාර්ග ගත යුතු බව විගණන නිලධාරීන් මෙහිදී නිර්දේශ කර තිබෙනවා.
ශ්රී ලංකා රේගුවේ 2022 වාර්ෂික වාර්තාවට ඇතුළත් කර ඇති විගණන වාර්තාවේ මෙම තොරතුරු සඳහන් වෙනවා.