පාස්කු ප්‍රහාරයේ විමර්ශනවල ප්‍රගතිය ගැන විපක්ෂය විසින් විමසීම විහිළුවක් බව මහජන ආරක්ෂක අමාත්‍ය සරත් වීරසේකර පවසනවා.
ඒ, මාවනැල්ල ප්‍රහාරය සම්බන්ධයෙන් ඔත්තුව දුන් මොහොමඩ් තස්ලීම් වෙත රු. ලක්ෂ 25ක මුදල් ත්‍යාගයක් ලබාදීමේ අවස්ථාවෙන් ආතුරුව මාධ්‍ය වෙත විශේෂ ප්‍රකාශයක් සිදු කරමින්.
පාස්කු ප්‍රහාරයට පෙර සිද්ධි 10ක් සිදුව තිබෙන අතර එම කිසිම සිද්ධියක් සම්බන්ධයෙන් නිසි ක්‍රියාමර්ග නොගත්, එමෙන්ම, එවකට රාජ්‍ය බුද්ධි අංශ ප්‍රධානියා විසින් සහරාන්ව අත්අඩංගුවට ගන්නා ලෙස රජයට කියා තිබියදීත් ඒ කිසිවක් නොකොට දැන් පාස්කු ප්‍රහාරයේ විමර්ශනවල ප්‍රගතිය ගැන විපක්ෂය විමසමින් සිටින බවයි අමාත්‍යවරයා පවසන්නේ.
එමෙන්ම, පාස්කු විමර්ශන සම්බන්ධයෙන් කාදිනල් මැල්කම් රංජිත් හිමිපාණන් ද සැක පළකර ඇති නමුත් දැනටමත් පුද්ගලයන් 32කට එරෙහිව නඩු 09ක් ගොණු කර ඇති බවයි ඔහු පෙන්වා දෙන්නේ.
තවද, මීට අමතරව තවත් 25 දෙනෙකුට නඩු පැවරීමට නීතිපතිවරයා කටයුතු කර තිබෙන බවත් මේ වන විට සිද්ධියට සම්බන්ධයෙන් සැකකරුවන් 724ක් අත්අඩංගුවේ පසුවන බවත් අමාත්‍යවරයා සිහිපත් කර සිටිනවා.
