ඉන්දියාවේ ජම්මු හි ගුවන් හමුදා කදවුරට මීට දින තුනකට පෙර පුපුරණ ද්‍රව්‍ය හෙළිමට යොදාගත් ඩ්‍රෝන යානා දෙක නිරුපද්‍රිතව පළා ගොස් ඇතැයි මූලික පරීක්ෂණවලදී හෙළිදරව් වී තිබේ.
කුඩා ඩ්‍රෝන යානා දෙකක අසල ප්‍රදේශයක සිට ගුවන්ගත කරවා එමගින් පුපුරණ ද්‍රව්‍ය කදවුරු භුමියට වැටීමට සළස්වා ඇති බව ඉන්දීය මාධ්‍ය වාර්තා කර තිබිණ.
එහිදී එක් පුපුරණ ද්‍රව්‍ය පාර්සලයක් පතිත වීමෙන් කදවුරු භුමියේ ගොඩනැගිල්ලක වහලයකට හානි සිදුවී තිබූ අතර අනෙක් පුපුරණ ද්‍රව්‍ය පාර්සලය පතිත වී තිබුණේ විවෘත භුමියකටයි.
සිදුවීමෙන් අනතුරුව ඉන්දීය ගුවන් හමුදාව ප්‍රමුඛ ආරක්ෂක අංශ දියත් කළ පරීක්ෂණවලදී හෙළිවී ඇත්තේ මේ සදහා යොදාගත් කුඩා ප්‍රමාණයේ ඩ්‍රෝන යානා ඉන් අනතුරුව නිරුපද්‍රිතව ඉවතට ගමන් කර ඇති බවයි.
කෙසේවෙතත්, මේ ප්‍රහාරය සම්බන්ධයෙන් ඊට වඩා වැඩි තොරතුරක් මෙතෙක් අනාවරණය වී නැතැයිද ඉන්දීය මාධ්‍ය වාර්තා කරයි.
මේ අතර ඉන්දීය ආරක්ෂක බලධාරීන් සදහන් කර ඇත්තේ විවිධ ත්‍රස්ත කණ්ඩායම්වලින් මින් ඉදිරියටද මෙවැනි ප්‍රහාර එල්ලවීමේ අවදානමක් ඇති බැවින් ඊට මුහුණදීම සදහා විශේෂ ආරක්ෂක වැඩපිළිවෙලක් සකස් කර ඇති බවයි.
