ශ්‍රී ලංකාව (241/9) සමග පැවති දෙවන එක්දින තරඟය කඩුලු 8කින් ජයගත් එංගලන්තය (244/2) තවත් තරඟයක් ඉතිරිව තිබියදීම එක්දින තරගාවලිය 2-0ක් ලෙස ජයගැනීමට සමත් වුණා.
දි ඕවල් ක්‍රීඩාංගණයේ පැවති තරඟයේ කාසිය වාසිය දිනූ එංගලන්තය පන්දු යැවීම තෝරා ගත්තා.
ඒ තීරණය අතිශයින්ම නිවැරදි බව තහවුරු කළ Sam Curran ශ්‍රී ලංකා ඉනිම සුණු විසුණු කළේ ලකුණු 48කට කඩුලු 5ක් දවාගනිමින්.
සිය පළමු පන්දුවාර 2ක තුල ඔහු ලකුණු 3කට කඩුලු3ක් දවාගත්තේ ශ්‍රී ලංකා මුල් පෙල පිතිකරුවන්ට කල්වේලා ඇතුවම ක්රීඩාගාරයේ අසුන් වෙන් කරමින්.
කරන්ට අනගි සහයක් ලබා දුන් David Willey ලකුණු 64කට කඩුලු 4ක් දවාගත්තා.
මුල්පෙල පිතිකරුවන් අමතක කල වගකීම පසුපෙල සමග භාරගත් ධනංජය ද සිල්වා ශ්‍රී ලංකා ඉනිම ගෞරවනීය ලකුණු සංඛ්‍යාවක් කරා රැගෙන ගියා.
ධනංජය ලකුණු 91ටත් දසුන් ශානක ලකුණු 47කටත් දැවීගියා.
නමුත් එංගලන්තය වෙනුවෙන් අර්ධ ශතක 3ක් රැස් කරගත් ජෝ රූට් (68), ඔයින් මෝර්ගන්(75) සහ ජේසන් රෝයි (60) පහසුවෙන්ම සිය කණ්ඩායම ජයග්‍රහණය කරා රැගෙන ගියා.
ඒ අනුව පන්දුවාර 43ක් තුල කඩුලු 2ක් පමණක් දැවී ලකුණු 244ක් ලබා ගනිමින් එංගලන්තය තරගය ජයගත්තා.
