2022 දෙසැම්බර් මාසයෙන් පසු ශ්‍රී ලංකාවෙන් විදේශගත වූ සහ වැටුප් රහිත නිවාඩු ලබා ගෙන, සේවයෙන් ඉවත් වූ ගුරුවරුන් සංඛ්‍යාව 5000 ඉක්මවා ඇති බවට ලංකා ගුරු සංගමය පවසනවා.
ඔවුන් පවසන්නේ ගුරුවරුන් සම්පූර්ණයෙන් ම ගුරු සේවයෙන් ඉවත් වී විදේශගත වීමේ ප්‍රවණතාවක් මේ වන විට ඇති වී තිබෙන බවයි.
එය මෙරට අධ්‍යාපනය බරපතළ ලෙස කඩා වැටීම සඳහා බලපාන බව ඔවුන් පවසනවා.
සේවයෙන් ඉවත් වී ඇති ගුරුවරුන් අතර වැඩි දෙනෙකු ඉංග්‍රීසි, විද්‍යාව, ගණිතය, තාක්ෂණවේදය, තොරතුරු තාක්ෂණය යන විෂයයන් උගන්වන ගුරුවරුන් බවයි වාර්තා වන්නේ.
මෙම විෂයයන් සඳහා සිටි එක ම ගුරුවරයා ද අහිමි වීමේ අවදානම නිසා මෙම තත්ත්වය දුෂ්කර පාසල්වලට ප්‍රභලව ම බලපා තිබෙනවා.
රජය මගින් මේ වසර තුළ රාජ්‍ය සේවයට බඳවා නොගැනීමට තීරණයක් ගෙන ඇති බැවින් මේ වසර අගදී තවත් ගුරුවරුන් 5000ක ට ආසන්න සංඛ්‍යාවක් විශ්‍රාම යාමට නියමිත බවයි වාර්තා වන්නේ.
ඒ හේතු මත මේ රටේ අනාගත පරපුර දැනුමෙන්, කුසලතාවයෙන් හා ආකල්පයෙන් පෝෂිත පිරිසක් බවට පත් කිරීම ගැටලුවක් වනු ඇති බව ලංකා ගුරු සංගමය පවසනවා.
40,000ක ට ආසන්න ගුරු හිඟය පවතිද්දී මෙලෙස විශ්‍රාම යාම සහ ගුරු වෘත්තියෙන් ඉවත්වීම බරපතල ප්‍රතිඵල ගෙන දෙන්නක් බවත් එය බරපතළ ලෙස බලපා ඇත්තේ දුෂ්කර පළාත් සඳහා බලපා තිබෙන බවත් ගුරු සංගමය සඳහන් කරනවා.
වෙනත් ක්ෂේත්‍ර සඳහා රාජ්‍ය බඳවා ගැනීම් සිදු නොකළ ද ගුරු පුරප්පාඩු හැකි තරමින් හෝ පිරවීම රජයේ වගකීමක් වන අතර එය ඉටු කරන ලෙසට ලංකා ගුරු සංගමය ඉල්ලා තිබෙනවා.
ලංකාවේ ගුරුවරුන් මෙසේ රැල්ලක් සේ විදේශගත වීම සහ වැටුප් රහිත නිවාඩු ලබා ගැනීම වැළැක්වීමට නම් වහා ම මේ සඳහා රජය මැදිහත් වී ගුරුවරුන්ට ජීවත්වීමට හැකි පරිදි ඔවුන්ගේ වැටුප් විෂමතා අවසන්කර කර දී රඳවා ගැනීමට කටයුතු කළ යුතු බව පෙන්වා දෙනවා.
