විවිධ උපක්රම මගින් පාර්ලිමේන්තුවේ ඔලුගෙඩි දිනාගැනීමට පෙර ජනතාව දිනාගැනීමට රජය කටයුතු කළ යුතු බව ශ්රී ලංකා නිදහස් පක්ෂයේ භාණ්ඩාගාරික, හිටපු රාජ්ය අමාත්ය ලසන්ත අලගියවන්න මහතා පවසනවා.
ජනතාව සහ ජාත්යන්තරය දිනාගැනීමට සියලුම පක්ෂවලින් සමන්විත ආණ්ඩුවක් පිහිටුවීමට ගෝඨාභය රාජපක්ෂ ජනාධිපතිවරයා කටයුතු කළ යුතු බවයි ඒ මහතා පවසන්නේ.
ජනතාවට පිළිගත හැකි ආණ්ඩුවක් පිහිටුවීමෙන් තොරව වෙනත් කිසිදු විසඳුමක් වර්තමාන අර්බුදයට නොමැති බවත් එම ආණ්ඩුව එක් දේශපාලන පක්ෂයක ආණ්ඩුවක් වීම ඵලදායි නොවන බවත් අලගියවන්න මහතා පවසනවා.
ශ්රී ලංකා නිදහස් පක්ෂය ඇතුළු පක්ෂ 11 යෝජනා ඉදිරිපත් කරමින් එවැනි ආණ්ඩුවක් පිහිටුවීමට ජනාධිපතිවරයාට හොඳ අවස්ථාවක් ලබාදුන් බවත් ඉතිහාසයේ මෙන්ම මෙවර ද ජනාධිපතිවරයා එම අවස්ථාව පැහැර හැරි බවත් අලගියවන්න මහතා පෙන්වා දෙනවා.
ආර්ථික අර්බුදය විසදීමට පෙර දේශපාලන අර්බුදයට විසඳුමක් ලබාදිය යුතු බවත් ශ්රී ලංකා නිදහස් පක්ෂය අඛණ්ඩව ජනතාව වෙනුවෙන් පෙනී සිටින බවද ඔහු වැඩිදුරටත් සඳහන් කරනවා.