ප්‍රමාණවත් දත්ත ආරක්ෂණ ක්‍රමවේදයක් හා සයිබර් ආරක්ෂාව තහවුරු කිරීමට නොහැකිවීම හේතුවෙන් ප්‍රංශය රජයේ සේවකයින්ගේ දුරකථනවල TikTok, Twitter, Instagram තහනම් කර ඇති බව විදෙස් මාධ්‍ය වාර්තා වෙනවා.
එරට සිවිල් සේවා අමාත්‍යාංශය ට්විටර් පණිවුඩයක් නිකුත් කරමින් අදාළ තහනම පිළිබදව නිවේදනය කර තිබුණා.
පසුගිය සති කිහිපය පුරා ධවල මන්දිරය, එක්සත් රාජධානියේ පාර්ලිමේන්තුව, ලන්දේසි සහ බෙල්ජියම් පරිපාලනය, නවසීලන්ත පාර්ලිමේන්තුව සහ කැනඩාව, ඉන්දියාව, පකිස්ථානය, තායිවානය සහ ජෝර්දානය යන රජයන් සහ ආයතන මාලාවක් TikTok තහනම් කරනු ලැබූවා.
එයට ප්‍රධානම හේතුව වූයේ TikTok මගින් රැස් කරන ලද පරිශීලක දත්ත වෙත චීන රජයට ප්‍රවේශ විය හැකි බවට එක්සත් ජනපද නීති සම්පාදකයින් සහ ජාතික ආරක්ෂක නිලධාරීන් පැවසීමත් සමඟයි.
මීට අමතරව පසුගිය නොවැම්බර් මාසයේදී FBI හි අධ්‍යක්ෂ Christopher Wray ප්‍රකාශ කර තිබුණේ TikTok සමාජ මාධ්‍ය ජාතික ආරක්ෂක අවදානම් මතු කරන බවයි.
කෙසේ නමුත් මේ සම්බන්ධයෙන් චීන විදේශ අමාත්‍යාංශයේ ප්‍රකාශක වැන්ග් වෙන්බින් කියා සිටියේ, ටික්ටොක් තම ජාතික ආරක්ෂාවට තර්ජනයක් වන බවට එක්සත් ජනපදය තවමත් සාක්ෂි ඉදිරිපත් කර නොමැති බවයි.
TikTok යෙදවුම චීන මවු සමාගමක් වන ByteDanceට අයත්වනවා.
2017 දී චීනය විසින් පනවන ලද නීතියක් මගින් රටේ ජාතික ආරක්ෂාවට අදාළ ඕනෑම පුද්ගලික දත්තයක් රජයට ලබා ගත හැකියි.
TikTok එවැනි දත්ත ලබාදී ඇති බවට කිසිදු සාක්ෂියක් නොමැති වුවත් එය එකතු කර ඇති පරිශීලක දත්ත ප්‍රමාණය විශාලවන බැවින් බිය සැක ඇතිවෙමින් තිබෙනවා.
මේ සම්බන්ධයෙන් චීනය ප්‍රකාශ කර තිබුණේ වොෂින්ටනය වැරදි තොරතුරු පතුරුවා හරිමින් TikTok මර්දනය කරන බවයි.
