අප්රේල් මස 19 වනදා සිට ජූනි 1 දා අතර සති හයක් පුරා පැවැත්වෙන ඉන්දියාවේ 2024 මහ මැතිවරණය වෙත මේ වන විට ලෝකයේම අවධානය යොමුව තිබෙනවා.
මෙවැනි පසුබිමක් තුළ ඉන්දියාවේ බැංගලෝර් නගරයේ ඡන්ද දායකයින් හට නොමිලේ ආහාර පාන, මෙන්ම ප්රවාහන පහසුකම්ද සලසා දැමීමට එරට සමාගම් රැසක් කටයුතු කරන බවට පුවතක් වාර්තා වෙනවා.
කර්ණාටක ප්රාන්තයේ පිහිටි බැංගලෝර් නගරයේ ඡන්දය භාවිත කරන පුද්ගලයන්ගේ ප්රතිශතය ඉතා අවම මට්ටමට පැවතීම හේතුවෙන් අදාළ සමාගම් විසින් මෙම පියවර ගෙන තිබෙනවා.
ඒ අනුව, බැංගලෝරයේ හෝටල්, කුලී රථ සමාගම් සහ අනෙකුත් සේවා සැපයීමේ ආයතන එක්ව ඡන්දය ලබා දීම වෙනුවෙන් පුද්ගලයන් දිරිමත් කිරීම සඳහා විවිධ වරප්රසාද ලබා දෙන බව වැඩිදුරටත් සඳහන් වෙනවා.
නොමිලේ ලබා දෙන බියර්, විශේෂ වට්ටම් සහිත කුලී රථ සේවා මෙන්ම නොමිලේ පවත්වන සෞඛ්ය පරීක්ෂණ ආදිය ඊට ඇතුළත්.
පාරිභෝගිකයින් විසින් ඡන්දය ලබා දුන් බවට සාක්ෂියක් වශයෙන් තීන්තවලින් පාට කරන ලද සිය ඇඟිල්ල පෙන් වූ විට ඇතැම් වෙළඳසැල්වලදී මෙලෙස නොමිලේ ආහාර පාන ලබා ගැනීමට පහසුකම් සලසා දී තිබෙනවා.
අදියර හතකින් යුත් ඉන්දීය මහ මැතිවරණයට අදාළව බැංගලෝරයේ ඡන්දය ලබා ගැනීම අද (26) සිදු කෙරෙනවා.
මැතිවරණ නීති උල්ලංඝනය නොවන අයුරින්, ඡන්දය භාවිත කරන පුරවැසියන් හට නොමිලේ හෝ විශේෂ වට්ටම් සහිතව අවසර ලබා දෙන බවට කර්ණාටක ප්රාන්තයේ මහා අධිකරණය පසුගියදා (24) තීරණයක් නිකුත් කර තිබුණා.
ඒ අනුව, එක් එක් හෝටල් සහ ආහාර අලෙවි සැල් ඔවුන්ගේ කැමත්ත පරිදි, කෝපි, තෝසේ, පලතුරු බීම ආදී ආහාර නොමිලේ හෝ වට්ටම් සහිතව ලබා දීමට සූදානමින් සිටිනවා.
එමෙන්ම, බැංගලෝරයේ ජනප්රිය විනෝද උද්යානයක් වන Wonderla , වට්ටම් සහිත මිල ගණන් යටතේ ඡන්දදායකයින්ට ප්රවේශපත්ර ලබා දීමටද තීරණය කර තිබෙනවා.
තවද, බැංගලෝරයේ ප්රසිද්ධ මත්පැන් අලෙවි සැලක් වන Deck of Brews, ඡන්දය ලබා දී පැමිණෙන පළමු පාරිභෝගිකයින් 50 දෙනාට නොමිලේ බියර් ලබා දෙන බවද වාර්තා වෙනවා.
2019 වසරේ පැවති අවසන් මහ මැතිවරණයේදී, 53.7%ක් වන කර්ණාටක ප්රාන්තයේ අඩුම ඡන්ද ප්රතිශය බැංගලෝරයේ දකුණු මැතිවරණ කොට්ඨාශය වාර්තා කර තිබුණා.