පූර්ව ඡන්ද ප්රකාශන අයිතිය කඩිනමින් තහවුරු කරන්නැයි මැතිවරණ ප්රචණ්ඩ ක්රියා නිරීක්ෂණ මධ්යස්ථානය මැතිවරණ කොමිසමෙන් නැවතත් ඉල්ලීමක් කළේ යැයි එහි ජාතික සම්බන්ධීකාරක මංජුල ගජනායක මහතා ‘නිව්ස් 19’ ට අද(8) පැවැසීය.
පසුගිය මැතිවරණයේ ප්රතිපල අනුව ලක්ෂ තිහක පමණ පිරිසකට පූර්ව ඡන්ද ප්රකාශන අවස්ථාව අවශ්ය බව මැනවින් පැහැදිලි වී යැයි ද ගජනායක මහතා කීවේය.
පූර්ව ජන්ද භාවිතය පිළිබඳව ශ්රී ලංකාව තවමත් පසුවන්නේ වසර හතලිහකටත් වඩා පසුපසින් වන යැයි කී හෙතෙම සෑම මැතිවරණයකදීම පහසුකම් අවම වීම තුළ තම පරමාධිපත්යය බලය අභ්යාස කිරීමට නොහැකිවන පිරිස සංඛ්යාත්මකව විශාල යැයි අවධාරණය කළේය.
ජනමාධ්යවේදීන්, මැතිවරණ නිරීක්ෂකයන්, පෞද්ගලික ආරක්ෂක සේවයේ නිරත පිරිස්, කටුනායක -බියගම ප්රධාන ආයෝජන කලාපවල සේවයේ නියුතු තරුණියන්, මැතිවරණ දිනයේ ධිවර රැකියාවේ නිරත පිරිස් මෙන්ම රක්ෂිත බන්ධනාගාරගත රැඳවියන්, මැතිවරණ දිනයේ රෝහල්ගත පිරිස් හා අත්යවශ්ය රාජකාරි වල නිරත පිරිස් ආදී වශයෙන් විශාල පිරිසක් මේ අතර සිටින්නේ යැයි ද ගජනායක මහතා සඳහන් කළේය.
පසුගිය පාර්ලිමේන්තු මැතිවරණයේ දී භාවිත කරන ලද මුළු ජන්ද සංඛ්යාව 12,343,309 (ලක්ෂ 123ක්) වූ අතර මුළු ජන්ද හිමියන් සංඛ්යාව එවකට 16,263,885 (ලක්ෂ 162ක්) විය. ඒ අනුව විවිධ හේතු නිසා භාවිත නොකරන ලද ජන්ද සංඛ්යාව 3,920,576 (ලක්ෂ 39ක් ) විය.