මේ වන විට කොවිඩ් අර්බුදයේ පතුලේ ගිලී සිටින ඉන්දියාව පිළිබදව මුළු ලෝකයේම අවධානය යොමුව තිබෙනවා.
ඊයේ දිනයේ පමණක් ඉන්දියාවේ කොවිඩ් මරණ 2000 කට අධික සංඛ්‍යාවක් සිදුව ඇති බවයි වාර්තා වන්නේ.
ඉන්දියාවේ සෞඛ්‍ය පුරුදු ඉතාමත් අඩුවශයෙන් ක්‍රියාත්මක වන අතර ග්‍රාමීය ජනතාව තවමත් කොවිඩ් වසංගතයේ බරපතලකම තේරුම් නොගැනීමද මීට හේතුවක් ලෙස දැක්වෙනවා.
මේ අතර ඉන්දියාවේ බැංගලෝර් නගරයේ හින්දු බැතිමතුන් ‘රාම් නවාමී’ සැණකෙළිය සමරද්දී, ඊට සමගාමීව, කොවිඩ් වසංගතයෙන් බේරීමේ යහපත් සෞඛ්‍ය පුරුදු සම්බන්ධයෙන් බැංගලෝර් වැසියන් දැනුවත් කිරීමේ විශේෂ වැඩසටහන් ආරම්භ කර තිබෙනවා.
ඒ සඳහා හින්දු වැසියන් දේවත්වයෙන් සලකන දේව චරිත, බැංගලෝර් වීදි සංචාරය කරමින්, මුහුණු ආවරණ පැලඳීම සම්බන්ධයෙන් ජනතාව දැනුවත් කරමින් සහ මුහුණු ආවරණ නොමැති පුද්ගලයන්ට මුහුණු ආවරණ බෙදාදෙමින් කටයුතු කරන ආකාරය ඉන්දීය මාධ්‍ය වාර්තා කර තිබුණා.
රාමායණයේ එන වීර චරිත වන රාමා, සීතා, ලක්ෂ්මණ් සහ හනුමන් ආකාරයෙන් සැරසුණු ජනතාවට සෞඛ්‍ය පුරුදු මෙන්ම මුහුණු ආවරණ පැළදීමේ අවශ්‍යතාවය දැනුවත් කරන වැඩසටහන් මෙහිදී ක්‍රියාත්මක වී තිබෙනවා.
