නව හැටන් දුම්රිය ස්ථානය ඉදිකිරීම ඇතුළු යටිතල පහසුකම් වැඩි දියුණු කිරීමේ ව්‍යාපෘතිය නාගරික සංවර්ධන අධිකාරිය සහ දුම්රිය දෙපාර්තමේන්තුව අතර කඹ ඇදීමක් හේතුවෙන් වසර දෙකහමාරක පමණ කාලයක සිට නතරවි තිබෙනවා.
මේ හේතුවෙන් කෝටි හතළිහක පමණ පාඩුවක් සිදු වී ඇතැයි පරිසරයේ ස්වභාවික සම්පත් සහ තිරසර සංවර්ධනය පිළිබඳ ආංශික අධීක්ෂණ කාරක සභාවේදී තොරතුරු අනාවරණය වි තිබුණා.
මෙම ව්‍යාපෘතිය කඩිනමින් අවසන් කිරීමට එම මුදල් නාගරික සංවර්ධන අධිකාරියට ලබාදී තිබුණේ මහ භාණ්ඩාගාරයෙන් බව බව කාරක සභාවේ සභාපති ගම්පහ දිස්ත්‍රික් පාර්ලිමේන්තු මන්ත්‍රී අජිත් මාන්නප්පෙරුම මහතා පවසනවා.
මෙම ව්‍යාපෘතියට අදාල කොටසක් පමණක් නිමකර ඇති බවත් වසර දෙකහමාර කාලය පුරාම සිදුවී ඇත්තේ එම ව්‍යාපෘතිය විවෘත කිරීම
සම්බන්ධයෙන් ලිපි හුවමාරු කිරීම පමණක් බවත් ඔහු සඳහන් කරනවා.
මෙම ව්‍යාපෘතියට අදාළව එක ලිපියක් එහා මෙහා හුවමාරු වීමට පමණක් මාස පහක පමණ කාලයක් ගතවී තිබූ බවටද කමිටුවේදී තොරතුරු හෙළි වි තිබෙනවා.
මේ අතර හැටන් දුම්රිය ස්ථානයේ අයිතිය සහ එහි භාණ්ඩ දුම්රිය දෙපාර්තමේන්තුවට අනිද්දා(13) භාර දෙන ලෙස කමිටු සභාපති අජිත් මාන්නප්පෙරුම මහතා නාගරික සංවර්ධන අධිකාරියට නිර්දේශ කර තිබෙනවා.
තවද පිබිදෙන පොළොන්නරුව වැඩසටහන යටතේ 2021 වර්ෂයේදී ඉදි කෙරුණු පොළොන්නරුව හිඟුරක්ගොඩ දුම්රිය සේවක නිල නිවාසය මේ වනතුරු ප්‍රයෝජනයට ගෙන නැති බවද එම කමිටුව සඳහන් කරනවා.
