බංගලාදේශය එරට ක්‍රියාත්මක ඉස්ලාම් අන්තවාදී සංවිධානවලට එරෙහිව නීතිය ක්‍රියාත්මක කිරීමේ මෙහෙයුම් දැඩි කර තිබේ.
ඒ අනුව අප්‍රේල් මස 11 වනදා සිට මේ දක්වා ඉස්ලාම් අන්තවාදී සංවිධානවල නායකයන්, සාමාජිකයන් ඇතුළු සියගණනක පිරිසක් බංගලාදේශ පොලිසිය මගින් අත්අඩංගුවට ගෙන ඇත.
රට තුළ නොසන්සුන්කාරී සහ කඩාකප්පල්කාරී වාතාවරණයක් ඇති කිරීම, කුමන්ත්‍රණකාරී ක්‍රියාවල නිරතවීම මොවුන්ට එරෙහිව ඇති ප්‍රධානතම චෝදනාවයි.
පසුගියදා ඉන්දීය අග්‍රාමාත්‍ය නරේන්ද්‍ර මෝදි බංගලාදේශයේ සංචාරය කළ අවස්ථාවේදී විරෝධතා දක්වමින් කඩාකප්පල්කාරී ලෙස හැසිරීමද මොවුන්ට එරෙහිව එල්ල වී ඇති තවත් චෝදනාවකි.
අත්අඩංගුවට ගත් අය අතරින් වැඩි පිරිසක් හෆ්සාත් මේයාම් නම් ඉස්ලාම් අන්තවාදී සංවිධානයේ නායකයන් බව බංගලාදේශ ආරක්ෂක බලධාරීන් ප්‍රකාශ කර තිබේ.
