මේ වන විට මතභේදයට තුඩුදී තිබෙන වෙන්නප්පුව පොලීසියේ හිටපු සහකාර පොලිස් අධිකාරී එරික් පෙරේරා මහතාව හලාවත මැතිවරණ කොට්ඨාශයෙන් බැහැරට ස්ථාන මාරුවක් දෙන ලෙසට ඉල්ලා පොල්, කිතුල් හා තල් වගා ප්‍රවර්ධනය හා ආශ්‍රිත කාර්මික භාණ්ඩ නිෂ්පාදන හා අපනයන විවිධාංගීකරණ රාජ්‍ය අමාත්‍ය අරුන්දික ප්‍රනාන්දු මහතා මහජන ආරක්ෂාව පිළිබද අමාත්‍ය සරත් වීරසේකර මහතාට ලිපියක් යොමුකර තිබෙනවා.
එහි සඳහන් කර ඇත්තේ අදාල පොලිස් නිලධාරියා යහපාලන ආණ්ඩු සමයේ වෙන්නප්පුවේ සහකාර පොලිස් අධිකාරීවරයා ලෙස පත්වීම ලැබූ බවයි.
එමෙන්ම වෙන්නප්පුව ප්‍රදේශයේ කසිප්පු පෙරන පුද්ගලයින් අත්අඩංගුවට ගෙන හෙරොයින් මත්කුඩු දමා සාදාගත් චෝදනා මත අදාල පුද්ගලයින් රිමාන්ඩ් කිරීමේ විෂමාචාර සිදුවීම්ද ඔහු කර ඇති බව අදාල ලිපියෙහි සදහන්.
ලිපිය මඟින් අරුන්දික ප්‍රනාන්දු අමාත්‍යවරයා සඳහන් කර ඇත්තේ දශක ගණනාවක් පුරාවටම හොර මත්පැන්වලට ප්‍රසිද්ධියක් උසුලන තම මැතිවරණ කොට්ඨාශයේ ජනතාව අනවසර මත්පැන් පෙරීම සිදුකරමින් සිටින බවයි.
අදාල ජාවාරම්කරුවන් මෙලෙස අත්අඩංගුවට ගැනීමෙන් ඔවුන්ගේ පවුල්වල දරුවන් හා ඔවුන්ගෙන් යැපෙන්නන් දැඩි අපහසුතාවට සහ මානසික පීඩනයකට ලක්වන බව මහජන ආරක්ෂක අමාත්‍යවරයා හට ලිපියෙන් දැනුම්දී තිබෙනවා.
එබැවින් මෙම විෂමාචාරවලට සම්බන්ද සහකාර පොලිස් අධිකාරීවරයා සහ පොලිස් පරීක්ෂක දක්ෂිණ, උප පොලිස් පරීක්ෂක මධුසංක හා උප පොලිස් පරීක්ෂක ගිහාන් යන අයව වහාම ක්‍රියාත්මක වන පරිදි විනය පරීක්ෂණයක් පවත්වා හලාවත මැතිවරණ කොට්ඨාශයෙන් බැහැරට ස්ථාන මාරුවක් ලබාදෙන ලෙස අදාල ලිපියෙන් අරුන්දික ප්‍රනාන්දු රාජ්‍ය අමාත්‍යවරයා ඉල්ලා තිබෙනවා.
