හොංකොං වැසියන්ගෙන් බහුතරයක් සිය අනාගතය සම්බන්ධයෙන් දැඩි අවිනිශ්චිත ස්වභාවයකට මුහුණ දී ඇතැයි වාර්තා වේ.
තායිපේ ටයිම්ස් පුවත්පත වාර්තා කර ඇත්තේ හොංකොං වැසියන්ගෙන් 60% පමණ එරට මෙන්ම ඔවුන්ගේ අනාගතය පිළිබදවද දැඩි නොසන්සුන්තාවයකට සහ බියකට පත්ව සිටින්නේයැයි සමීක්ෂණයකදී අනාවරණය වී ඇති බවයි.
චීනයේ බලපෑම මත හදුන්වාදුන් ජාතික ආරක්ෂක නීති හරහා හොංකොංහි ප්‍රජාතන්ත්‍රවාදය දැඩි සීමා කිරීම්වලට යටත් කර ඇති අතර මාධ්‍ය ආයතන වසා දැමීම්, මාධ්‍යවේදීන් අත්අඩංගුවට ගැනීම් ආදිය ඉහළ ගොස් තිබේ.
මේ හේතුවෙන් ප්‍රජාතන්ත්‍රවාදී දර්ශක රැසක හොංකොං දැඩි මර්දනකාරී කලාපයක් ලෙස ද ප්‍රකාශයට පත්වී ඇත.
බ්‍රිතාන්‍යයන් විසින් හොංකොං චීනය වෙත භාරදී වසර විසි හතරක් ගතවී ඇති අතර මෑතකාලීනව චීනය එහි ස්වයංපාලන ලක්ෂණ දුර්වල කරමින් ප්‍රධාන රාජ්‍යයේ පාලනය මර්දනකාරී ආකාරයකින් ස්ථාපිත කර ඇති බව විශ්ලේෂකයන්ගේ අදහසයි.
