රට ගොඩ නැගීමට හැක්කේ බැසිල් රාජපක්ෂට බවට කෙරෙන ප්‍රකාශ හරහා වක්‍රාකාරව ප්‍රකාශ වෙමින් ඇත්තේ ගෝඨාභය සහ මහින්ද රාජපක්ෂගේ අසාර්ථකභාවය බව ජනතා විමුක්ති පෙරමුණේ නායක, පාර්ලිමේන්තු මන්ත්‍රී අනුර කුමාර දිසානායක මහතා පවසනවා.
මන්ත්‍රීවරයා මේ බව සඳහන් කළේ අද (29) ජවිපෙ මූලස්ථානයේ පැවති මාධ්‍ය හමුවේදීයි.
ජනපතිවරයා සහ අගමැතිවරයා හට මේ රටේ ආර්ථිකය කළමණාකරනය කළ නොහැකි බවත් බැසිල් රාජපක්ෂ එය සිදු කරනු ඇති බවටත් හැඟවෙන ප්‍රකාශ සිදු කළද මෙතෙක් මේ රටේ ආර්ථිකය හැසිරවීමට බැසිල් රාජපක්ෂ සම්බන්ධ වී ඇති බවත් මෙරට මුහුණ දී ඇති ආර්ථික අර්බුද වලට ඔහුද වගකිව යුතු බවත් අනුර දිසානායක මහතා පෙන්වා දෙනවා.
දිළිඳුකම පිටුදැකීම, කොවිඩ් වසංගතය හමුවේ අත්‍යාවශ්‍ය සේවා පවත්වාගැනීම වැනි ක්‍රියාවලියන්ගේ ප්‍රධානියා ලෙස බැසිල් රාජපක්ෂ පත්කර ගනු ලැබූවද කොවිඩ් වසංගතය උත්සන්න වූ විට ඔහු රටේද නොරැඳී ඇමරිකාව වෙත ගිය බව ඔහු පෙන්වා දෙනවා.
