මාතර – තෙලිජ්ජවිල ප්‍රදේශයේ ඊයේ (20) රාත්‍රියේ සිදු වූ වෙඩි තැබීමෙන් මිය ගොස් ඇත්තේ, අපරාධකරුවන්ගේ ඉලක්කය වූ පුද්ගලයා නොවන බවට පොලිස් විමර්ශනවලින් අනාවරණය වී තිබෙනවා.
අදාළ වෙඩි තැබීමෙන් මිය ගොස් ඇත්තේ, 22 හැවිරිදි තරුණයෙකු වන මින්දික අලුත්ගමගේ නම් ඔහු දෙනිපිටිය ප්‍රදේශයේ පදිංචිකරුවෙක්.
ඔහු වෙඩිතැබීම සිදු වූ දුරකථන උපාංග අලෙවිසලට පැමිණි අයෙකු වන අතර, අපරාධකරුවන්ගේ ඉලක්කය වී තිබූණේ එම අලෙවිසලේ හිමිකරු බවට සිදු කළ විමර්ශනවල දී අනාවරණය වි තිබෙන බව පොලිස් මාධ්‍ය ප්‍රකාශක ජ්‍යේෂ්ඨ පොලිස් අධිකාරී නිතීඥ නිහාල් තල්දූව මහතා පවසනවා.
යතුරු පැදියකින් පැමිණි පුද්ගලයන් දෙදෙනකු එම වෙඩි ප්‍රහාරය එල්ල කර තිබු අතර සිදුවිම සීසීටීවී කැමරාවක ද සටහන් ව තිබුණා.
ඝාතකයන්, වෙඩිතැබීමට පෙර ද දුරකතන උපාංග අලෙවිසලට පැමිණ ඡායාපිටපත් ලබා ගැනීමට අවශ්‍ය බවට පවසා ඇති අතර, එහි දී හිමිකරු පවසා ඇත්තේ අදාළ පහසුකම නොමැති බවයි.
ඒ අනුව ඉන් පිටව යන සැකකරුවන් පසුව යළි පැමිණ මෙම වෙඩිතැබීම සිදු කර තිබෙනවා.
වෙඩිතැබීම සිදුවන අවස්ථාවේ දුරකතන උපාංග අලෙවිසලේ හිමිකරු පිටත රැඳී සිට ඇති අතර, අලෙවිසල තුළ සිට ඇත්තේ, හිමිකරුගේ මිතුරෙකු වන
මියගිය මින්දික අලුත්ගමගේ නම් තරුණයායි.
ඔහු සිය ජංගම දුරකතනය චාර්ජ් කරගැනීම සඳහා එම වෙළෙඳසලට පැමිණ තිබුණා.
මෙම වෙඩිතැබිම සිදුවු වෙළදසැළේ හිමිකරු 2020 වසරේදී සුරාසැලක් කොල්ලකෑමේ සිදුවිමකට පොලිස් අත්අඩංගුවට ගෙන පසුව මුදාහැර තිබෙන අතර එහිදි තමාට පොලිසියෙන් හිරිහැර සිදුවු බව පවසා ශ්‍රේඨාධිකරණයේ මුලික අයිතිවාසිකම් පෙත්සමක් ගොනුකර ඇති බවට වාර්තා වනවා.
එම මුලික අයිතිවාසිකම් පෙත්සම ඉල්ලා අස්කරගන්නා ලෙසට තමාට තර්ජනාත්මක ඇමතුම් ලැබුනු බව වෙළදසැලේ හිමිකරු පොලිසියට පවසා තිබුණා.
සිද්ධිය සම්බන්ධයෙන් මහෙස්ත්‍රාත් පරීක්ෂණය සිදු කෙරුණු අතර, වෙඩිතැබීම වෙළෙඳසලේ හිමිකරු ඉලක්ක කරගෙන සිදු කළ බවට මතු ව ඇති සැකය මත ඔහු ව පොලිස් භාරයට ගෙන ආරක්ෂාව ලබාදීමට මාතර ප්‍රධාන මහෙස්ත්‍රාත් අනුරුද්ධ බුද්ධදාස මහතා නියෝග කර තිබෙනවා.
මේ අතර වෙඩික්කරුවන් පැමිණි යතුරුපැදිය මාතර තිහගොඩ නාදුගල වේල්ල අසල දමා ගොස් තිබියදි පොලිසිය විසින් අද (21) සොයාගනු ලැබුවා.
පොලිසිය සඳහන් කළේ වෙඩික්කරුවන්ගේ යැයි සැකකෙරෙන ඇදුම් කිහිපයක් සහ හිස් ආවරණයක් එහි දමා ගොස් තිබු අතර යතුරුපැදියේ අංක තහඩුවද ඒ වන විට අතුරුදහන්ව තිබු බවයි.
සිදුවිම සම්බන්ධයෙන් වැඩිදුර විමර්ශන අපරාධ පරික්ෂණ දෙපාර්තමේන්තුවට බාරදී තිබෙනවා.
