හිටපු ජනාධිපති ගෝඨාභය රාජපක්ෂ මහතා විදේශයන්හිදී කරන කිසිදු වියදමක් සඳහා රජයේ මුදල් වැය නොකරන බව රජයේ ප්රවෘත්ති දෙපාර්තමේන්තුව නිවේදනය කරනවා.
සිය ආරක්ෂාව පතා මේ දිනවල විවිධ රටවලට සංක්රමණයවීමේදී ඔහු වියදම් කරනුයේ සිය පෞද්ගලික මුදල් බවයි අදාළ නිවේදනයේ සදහන් වන්නේ.
සතියේ ඇමති මණ්ඩල තීරණ දැනුම්දීම පිණිස රජයේ ප්රවෘත්ති දෙපාර්තමේන්තු ශ්රවණාගාරයේ ඊයේ (16) පැවති ප්රවෘත්ති සාකච්ඡාවේදී හිටපු ජනාධිපතිවරයාගේ එතෙර වියදම් ගැන මාධ්යවේදියෙක් ප්රශ්න කර සිටියා.
ඊට පිළිතුරු දෙමින් ජනමාධ්ය අමාත්ය බන්දුල ගුණවර්ධන මහතා කළ සඳහන් කළේ හිටපු සහ වත්මන් ජනාධිපතිවරුනට නීතියෙන්ම ඇතැම් වරප්රසාද හිමි බවත් හිටපු ජනාධිපතිවරයාගේ එතෙර වියදම් සඳහා රජය මුදල් වැය කරන බව ඇඟවෙන අයුරින් ඇතැම් මාධ්ය විසින් වාර්තා කර තිබූ බවයි.
මේ පිළිබඳව වැඩිදුරටත් සොයා බලා පිළිතුරු දෙන බවට ඔහු මෙම ප්රවෘත්ති සාකච්ඡාවේදී සදහන් කළා.
ඒ අනුව මේ වන විට තායිලන්තයේ රැදී සිටින ගෝඨාභය රාජපක්ෂ මහතා දැනුම්දී ඇත්තේ තමාගේ එතෙර වියදම් ගැන ඇතැම් මාධ්ය පළකර ඇති වාර්තා වැරදි බවයි.
තමාගේ සියලු වියදම් සඳහා වැය කරනුයේ සිය පෞද්ගලික මුදල් බවට ඔහු දැනුම්දී තිබෙනවා.