පාස්කු ප්‍රහාරය සම්බන්ධයෙන් හරීන් ප්‍රනාන්දු මහතා සිදුකළ ප්‍රකාශයට අදාලව ඔහුව අත්අඩංගුවට ගැනීමේ කිසිදු අවශ්‍යතාවයක් නොමැති බව හිටපු අග්‍රාමාත්‍ය, වත්මන් පාර්ලිමේන්තු මන්ත්‍රී රනිල් වික්‍රමසිංහ මහතා පවසනවා.
ඒ අද (19) දින පාර්ලිමේන්තුවේදී අදහස් දක්වමින්.
ඔහුගේ පියා සිදුකළ ප්‍රකාශයස් සම්බන්ධයෙන්හරීන් ප්‍රනාන්දු මහතාව රඳවා ගැනීමට පොලිසිය විසින් සිදුකළ උත්සහය හරහා මන්ත්‍රී වරප්‍රසාද කඩවීමක් සිදුවන බවයි රනිල් වික්‍රමසිංහ මහතා පෙන්වා දෙන්නේ.
ඊට ප්‍රතිචාර දක්වමින් මහජන ආරක්ෂක අමාත්‍ය සරත් වීරසේකර මහතා පෙන්වා දුන්නේ පාස්කු ප්‍රහාරයේ මහමොළකරු පිළිබඳව හරීන් ප්‍රනාන්දු මහතා දන්නා බව ප්‍රකාශ කර ඇති බැවින් ඔහු අපරාධ පරීක්ෂණ දෙපාර්තමේන්තුව වෙත පැමිණ ඒ සම්බන්ධයෙන් ප්‍රකාශ කළ යුතු බවයි.
එමෙන්ම, යහපාලන සමයේදී දූෂණ මර්දන ඒකකය නමැති ආයතනය හරහා මන්ත්‍රීවරුන් ගණනාවක් සිරගත කළ වික්‍රමසිංහ මහතාට මන්ත්‍රීවරුන්ගේ අයිතිවාසිකම් වෙනුවෙන් පෙනී සිටීමට කිසිදු සදාචාරාත්මක අයිතියක් නොමැති බවත් වීරසේකර මහතා ප්‍රකාශ කර සිටියා.
ඉන් පසු අදහස් දක්වමින් රනිල් වික්‍රමසිංහ මහතා ප්‍රකාශ කර සිටියේ සරත් වීරසේකර මහතා අදාලත්වයක් නොමැති ‘මල්ලෙ පොල්’ ප්‍රකාශ සිදු කරන බවයි. පාස්කු ප්‍රහාරය පිළිබඳව හරීන් ප්‍රනාන්දු මහතාගේ පියා විසින් සිදුකළ බවට පවසන ප්‍රකාශය හරීන් ප්‍රනාන්දු මහතා ඒ සම්බන්ධයෙන් පළමුවරට හෙලිකළේ තමා සමඟ බවත් එම ප්‍රකාශය පිළිබඳව අවශ්‍ය නම් තමාගෙන් විමසිය හැකි බවත් ඒ මහතා පාර්ලිමේන්තුවේදී අවධාරනය කර සිටියා.
