පාර්ලිමේන්තු නිලධාරිනියකට ලිංගික හිරිහැර කර ඇති බවට නඟන චෝදනාවලට තමා වරදරකරු වුවහොත් පාර්ලිමේන්තු ධූරයෙන් ඉල්ලා අස්වීමට සූදානම් බව කෝප් කමිටු සභාපති, පාර්ලිමේන්තු මන්ත්‍රී රංජිත් බණ්ඩාර මහතා පවසනවා.
අද (20) පාර්ලිමේන්තුවේදී විශේෂ ප්‍රකාශයක් සිදු කරමින් ඔහු මේ බව ප්‍රකාශ කළා.
රංජිත් බණ්ඩාර මහතා එහිදී වැඩිදුරටත් සඳහන් කළේ විපක්ෂයේ මන්ත්‍රී හේෂා විතානගේ මහතා නඟන චෝදනා මුළුමනින්ම අසත්‍යවන අතර එම චෝදනා තරයේ පතික්ෂේප කරන බවයි.
එමෙන්ම එම චෝදනා සම්බන්ධයෙන් පාර්ලිමේන්තු වරප්‍රසාද කමිටුව හමුවේ විභාග කරන ලෙස රංජිත් බණ්ඩාර මහතා මෙහිදී කතානායකවරයාගෙන් ඉල්ලා සිටියා.
ඔහු තවදුරටත් සඳහන් කළේ එම චෝදනා සඳහා තමා නිවැරදිකරුවෙකු බව තහවුරු වුවහොත් පාර්ලිමේන්තු වරප්‍රසාද කඩවීම යටතේ හේෂා විතානගේ මන්ත්‍රීවරයා දණ්ඩනයට ලක් කළ යුතු බවයි.
පාර්ලිමේන්තු නිලධාරිනියකට ලිංගික හිංසන සිදු කර ඇත්තේ පොදු ව්‍යාපාර කාරක සභාවේ වත්මන් සභාපති මහාචාර්ය රංජිත් බණ්ඩාර මහතා බව විපක්ෂ මන්ත්‍රී හේෂා විතානගේ මහතා පසුගියදා (18) පාර්ලිමේන්තුවේදී ප්‍රකාශ කළා.
හේෂා විතානගේ මන්ත්‍රීවරයා මීට පෙර දිනක කෝප් කමිටුවේ හිටපු සභාපතිවරයකු පාර්ලිමේන්තු නිලධාරිනියකට හිරිහැර කර ඇතැයි සඳහන් කළ අතර එම චෝදනාව හේතුවෙන් කෝප් කමිටුවේ හිටපු සභාපති වූ තමන් දැඩි අසීරුතාවට පත් වූ බවත් එබැවින් අදාළ සභාපතිවරයා කවුදැයි හේෂා විතානගේ මන්ත්‍රීවරයා හෙළි කළ යුතු බවත් හිටපු කෝප් සභාපති චරිත හේරත් මහතා පාර්ලිමේන්තුවේදී ඉල්ලා සිටියා.
ඉන් පසුව ප්‍රකාශයක් කරමින් හේෂා විතානගේ මහතා කියා සිටියේ මෙම චෝදනාවට ලක්ව ඇත්තේ හිටපු සභාපතිවරයා නොව වත්මන් කෝප් සභාපතිවරයා බවයි.
