ඉදිරියේදී රටේ හාල් හිඟ වුවහොත් මඤ්ඤෙක්කා, මුං. බතල කෑමට ජනතාවට හුරුවීමට සිදුවන බව වාරිමාර්ග අමාත්‍ය, රාජ්‍ය ආරක්ෂක හා ආපදා කළමනාකරණ, ස්වදේශ කටයුතු රාජ්‍ය අමාත්‍ය චමල් රාජපක්ෂ මහතා පවසනවා.
අතීතයේ ගම්වල ජනතාව වැඩි වශයෙන් මඤ්ඤෙක්කා වැනි දෑ ආහාරයට ගැනීම හේතුවෙන් පිළිකා තත්ත්වයන් අවම කර ගැනීමටද දායක වූ බවයි අමාත්‍යවරයා පෙන්වා දෙන්නේ.
ඊයේ (01) ශ්‍රී දළදා යල් අස්වනු පූජාවෙන් අනතුරුව මාධ්‍ය වෙත අදහස් දක්වමින් ඒ මහතා මෙම අදහස් පලකළා.
“ මමත් ගොවියෙක්. මම කාබනික පොහොර යොදලා වගා කරමින් සිටිනවා. අලුත් අයට මෙය අලුත් අත්දැකීමක්. මෙය දිගින් දිගටම කරගෙන යද්දි සාර්ථකව කරගත හැකිවෙයි. පළමුවන කන්නය අත්දැකීමක්. අස්වැන්න අඩු වුණොත් සහතිකයක් දීලා තියෙනවා අලාභයක් විදියට වන්දියක් ගෙවනවා කියලා. ඒකට බයවෙන්න දෙයක් නැහැ. හැම උද්ඝෝෂණයකම පසුබිමේ දේශපාලනයක් තියෙනවා. සියලු දෙනාගෙම වගකීම වසවිසෙන් තොර ආහාරයක් ජනතාවට දෙන්න ඕනෙ කියන එක. අපි බලන්න ඕනේ ජනතාවට ගුණාත්මක වස විසෙන් තොර ආහාර ලබාදෙන්න. ඉස්සර කෑගැහුවෙ බහුජාතික සමාගම් එපා කියලා. දැන් කියන්නේ රසායනික පොහොර ගන්න එයාලාව තියාගන්න කියලා. මේවා අපි කල්පනා කරලා බලන්න ඕනේ. අපේ බිමේ මඤ්ඤෙක්කා හොඳට වැවෙනවා. දේශීය අල වර්ග 60 කට වඩා තිබෙනවා. මුං ඇට, කව්පි බෝග තිබෙනවා. මේවා ආහාරයට ගැනීමට අපි පුරුදු වෙන්න ඕනෙ. රසායනික පොහොරවලට අපේ සල්ලි යනවා. දෙගොල්ලන්ම මේ කැපවීම කරන්න අවශ්‍යයි.”
