දෙමටගොඩ ප්‍රදේශයේදී පෙරේදා (17) මුලින් අනාවරණය කරගත් ඉන්දියානු ප්‍රභේදය රටේ සෙසු ප්‍රදේශවලට ද ව්‍යාප්ත වීමේ වැඩි අවදානමක් පවතින බව මහජන සෞඛ්‍ය පරීක්ෂකවරුන්ගේ සංගමය අනතුරු අඟවා තිබේ.
දෙමටගොඩ 66 වත්ත ලෙස හැඳින්වෙන ප්‍රදේශය සීමිත පහසුකම් සහිත විශාල ජනගහනයක් සිටින ප්‍රදේශයක් වන බවත් ඇතැම් පදිංචිකරුවන් දැඩි ලෙස මත්ද්‍රව්‍ය සඳහා අබ්බැහි වූ පිරිසක් බව මහජන සෞඛ්‍ය පරපරීක්ෂකවරුන්ගේ සංගමයේ ප්‍රධානි උපුල් රෝහණ මහතා පැවසීය.
මෙම ප්‍රදේශයේ පවුල් 149 ක් හා සම්බන්ධ වූ පුද්ගලයින් 900 ක් පමණ වෙසෙන බවට ගණන් බලා තිබේ.
පදිංචිකරුවන්ගෙන් බහුතරයක් සනීපාරක්ෂක වෘත්තියේ යෙදී සිටින අතර සැලකිය යුතු පිරිසක් ත්‍රිරෝද රියදුරන් වේ.
එවැනි පසුබිමක් තුළ ඉන්දියානු ප්‍රභේදය රටේ වෙනත් ප්‍රදේශවලට ද ව්‍යාප්ත වමේ බරපතල අවදානමක් පවතින බව ඔහු අවධාරණය කළේය.
රට තුළ සංචාරක සීමාවන් තිබුණද ප්‍රදේශයේ පදිංචිකරුවන් සෞඛ්‍ය මාර්ගෝපදේශ නොසලකා හරින බව ද උපුල් රෝහණ මහතා පැවසීය.
ඒ අනුව මේ පිළිබඳව අවදියෙන් සිටින ලෙසත් භයානක ඉන්දියානු ප්‍රභේදය පැතිරීම වැළැක්වීම සඳහා සියලු වැළැක්වීමේ පියවර ගන්නා ලෙසත් සෞඛ්‍ය අංශවලින් වැඩිදුරටත් ඉල්ලීම් සිදු කළ බව ද ඒ මහතා පවසා තිබේ.
