ඒ ඒ ප්‍රාන්තවලට සම්බන්ධ විවිධ උත්සවවලට අදාළ වන පරිදි කොරෝනා පැතිරීම වැළැක්වීමේ සීමා පනවන්නැයි ඉන්දීය මධ්‍යම රජය එරට ප්‍රාන්තවලට උපදෙස් නිකුත් කර තිබේ.
අගෝස්තු සිට දෙසැම්බර් දක්වා කාලය තුළ ඉන්දියාවේ බොහෝ ප්‍රාන්තවල විවිධ උත්සව පැවැත්වෙන අතර එහිදී ලක්ෂ සංඛ්‍යාත ජන ඒකරාශිවීම් දැකගත හැකිය.
මෙහිදී යළිත් කොරෝනා රැල්ලක් ඇතිවිය හැකි බැවින් එය වැළැක්වීම සදහා ප්‍රාන්ත මට්ටමින් අදාළ ප්‍රදේශ සහ කාල පදනම් කරගෙන සීමා පනවන ලෙස මධ්‍යම රජයෙන් උපදෙස් නිකුත් කර තිබේ.
පසුගිය මාර්තු අප්‍රේල් කාලයේ ඉන්දියාව පුරා කොරෝනා රැල්ලක් හටගත් අවස්ථාවේදී දෛනික අසාදිතයන් සංඛ්‍යාව ලක්ෂ හතර ඉක්වමා ගියත් මේ වනවිට එරට තුළ දෛනික කොරෝනා ආසාදිතයන් සංඛ්‍යාව සාමාන්‍යයෙන් 40,000 ක් පමණ වේ.
එයිනුත් සියයට පනහක් පමණම වාර්තා වන්නේ කේරල ප්‍රාන්තයෙන් වන අතර දිල්ලිය, උත්තර ප්‍රදේශ වැනි ප්‍රාන්තවල දෛනික අසාදිතයන් සංඛ්‍යාව පවතින්නේ සියයකටත් අඩු මට්ටමකය.
