පාස්කු ප්‍රහාරය සම්බන්ධයෙන් වගකීම් පැහැර හැරි පොලිස් නිලධාරීන්ට එරෙහිව චෝදනාපත්‍ර අනුමත කර එවා ඇති බවත්, එම චෝදනාපත්‍ර ඉදිරියේදී අදාල නිලධාරීන්ට බාර දෙන බවත් පොලිසිය බාර අමාත්‍ය සරත් වීරසේකර මහතා අද (18) පැවසීය.
පාස්කු ප්‍රහාරයේ විමර්ශන තත්ත්වය ගැන දැනුම්දීමට අද සූම් ඔස්සේ පැවැති මාධ්‍ය හමුවකදී ජනමාධ්‍යවේදියකු විමසූ ප්‍රශ්නයකට පිළිතුරු ලබා දෙමින් ඇමැතිවරයා මේ බව ප්‍රකාශ කළේය.
‘ඔවුන්ට විරුද්ධව විමර්ශනයක් කරලා ගිය අවුරුද්දෙද කොහෙද පොලිස් කොමිසමට බාර දීලා තියෙනවා. පොලිස් කොමිසම අහෝසි වෙනකොට ඒක රාජ්‍ය සේවා කොමිෂන් සභාවට බාර දීලා තියෙනවා.
ඊට පෙරේදා වෙනකොට ඒක රාජ්‍ය සේවා කොමිෂන් සභාවෙන් චෝදනාපත්‍ර පොලිසියට ලැබිලා තියනවා. ඔවුන්ට අපි ඒක යොමු කරනවා.’ යැයි ඇමැතිවරයා කීවේය.
පාස්කු ප්‍රහාරයේ වගකීම් පැහැර හැරීම සම්බන්ධයෙන් බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන්, ජ්‍යෙෂ්ඨ නියේාජ්‍ය පොලිස්පති ලලිත් පතිනායක, ජ්‍යෙෂ්ඨ නියෝජ්‍ය පොලිස්පති නන්දන මුණසිංහ මහත්වරුන් ඇතුළු නිලධාරීන් පිරිසකට චෝදනා පත්‍ර ලබා දිය යුතු බව පොලිස් විශේෂ විමර්ශන ඒකකට මීට පෙර පොලිස්පති මඟින් ජාතික පොලිස් කොමිෂන් සභාවට වාර්තාවක් යවා තිබිණි.
