සති 06ක් ගතවී ඇති බියකරු ගාසා මෙහෙයුමේ ඉමහත් ආන්දෝලනයකට ලක්වූ ගාසා නගරයේ අල් ෂිෆා රෝහල වටලෑම සාධාරණීයකරණය කිරීමට ඊශ්‍රායලය, හමාස් සංවිධානයට අලුත් චෝදනාවක් එල්ල කළා.
ඒ, හමාස් සංවිධානය පැහැරගත් ඊශ්‍රායල සෙබළියක, රෝහල තුළදී ඝාතනය කළ බවට සහ එහි ප්‍රාණ ඇපකරුවන් රැගෙන ආ බවට සාක්ෂි පවතින බව පවසමින්.
හමාස් සංවිධානය ප්‍රකාශ කර තිබුණේ, එම සෙබළිය ඊශ්‍රායල හමුදාව එල්ල කළ ගුවන් ප්‍රහාරයකින් ඇය මියගිය බවයි.
කෙසේ වෙතත්, ඊශ්‍රායල හමුදාව එල්ල කළ ප්‍රහාරයකින් ඇයට මාරාන්තික තුවාල සිදුවිය නොහැකි බවත්, ඇය හමාස් සංවිධානය විසින් රෝහල තුළදී ඝාතනය කළ බවට තොරතුරු පවතින බවත්, ඊශ්‍රායලය ප්‍රකාශ කළේ වැඩිදුර විස්තරයක් සඳහන් නොකරමින්.
මෙවන් පසුබිමක උතුරු ගාසාහි ඇති තවත් විශාල රෝහලක් වන ඉන්දුනීසියානු රෝහලට ඊශ්‍රායල ප්‍රහාර එල්ල වී තිබෙනවා.
එහිදී 12 දෙනෙකු මියගොස් වෛද්‍යවරු දෙදෙනෙක් තුවාල ලැබූ බවද සඳහන්.
නවතම වාර්තා සඳහන් කළේ, ඊශ්‍රායල යුද ටැංකි ගාසා නගරයේ ඉන්දුනීසියානු රෝහල වටලා ඇති බවත් හමුදාව ඊට ඇතුළුවීමට සූදානම්ව සිටින බවයි.
මේ අතර, දකුණු ගාසාහි ඛාන් යුනිස් නගරයට ඇදහැලෙන අධික වැසි හේතුවෙන් එහි සරණාගත කඳවුරු ජලයෙන් යටවී ගොස් තිබෙනවා.
ඒ හේතුවෙන්, කඳවුර තුළ පාචනය වැනි රෝග ව්‍යාප්තිය වේගවත් වනු ඇතැයි ලෝක සෞඛ්‍ය සංවිධානය පුරෝකතනය කරනවා.
