ගිණිගත් එක්ස්ප්‍රස් පර්ල් නෞකාව තුළ තිබූ විෂ රසායන සාගර ජලයට එකතු වූ බවට මෙතෙක් කිසිදු සාක්ෂියක් නොලද බවට වරාය හා නාවික අමාත්‍ය රෝහිත අබේගුණවර්ධන මහතා සහතික වනවා.
ඊයේ (09) පාර්ලිමේන්තුවේදී විපක්ෂ නායක සජිත් ප්‍රේමදාස මහතා යොමුකළ ප්‍රශ්නයකට පිළිතුරු දෙමින් රෝහිත අබේගුණවර්ධන මහතා මේ බව සඳහන් කරන ලදි.
මෙම නෞකා අනතුරින් පසුව, මියගිය මුහුදු ජීවින් රැසකගේ සිරුරු මුහුදු වෙරළට ගොඩගැසූ නමුත් එම මුහුදු ජීවීන් මරණයට පත්වීම හා නෞකාවේ සිදු වූ අනතුරු අතර සබඳතාවක් තිබෙන බවටද මෙතෙක් තහවුරු වී නොමැති බවයි ඇමතිවරයා පෙන්වා දෙන්නේ.
කෙසේ වෙතත්, එක්ස්ප්‍රස් පර්ල් නෞකාවේ සිදු වූ අනතුරින් පසුව මේ දක්වා කැස්බෑවුන් 176 කගේ, ඩොල්ෆින් මත්ස්‍යයන් 20 කගේ සහ තල්මසුන් 04 කගේ මළසිරුරු දිවයින වටා මුහුදු වෙළරට ගොඩගසා තිබිණි. මීට අමතරව කුඩා මසුන් විශාල ප්‍රමාණයක්ද මරණයට පත්ව තිබිණි.
