සුප්‍රකට අලිබාබා සමාගමේ නිර්මාතෘවරයාද, චීනයේ ඉහළම ධනපතියකුද වන ජැක් මා මේ දිනවල ඉතා අප්‍රකටව ජීවත් වන බව ඔහුගේ ව්‍යාපාරික සගයකු වන ජෝ ට්සායි ප්‍රකාශ කර තිබේ. ට්සායි යනු අලිබාබා සමාගම ආරම්භ කිරීමට ජැක් මා සමග එක්ව කටයුතු කළ අයෙකි. ඔහු පවසා ඇත්තේ මේ දිනවල ජැක් ප්‍රසිද්ධ අවස්ථාවන්ට එතරම් සහභාගි නොවන බවයි.
‘ඔහු බොහොම හොඳින් කල්ගත කරනවා. ඔහු විනෝදාංශයක් ලෙස මේ දිනවල චිත්‍ර ඇඳීමෙහි යෙදී සිටිනවා. ඇත්තෙන්ම ඔහු එය ඉතා හොඳින් කරගෙන යන බව පැවසිය යුතුයි’ යනුවෙන් ට්සායි මාධ්‍යට පවසා තිබිණි.
මෙයට මාස කිහිපයකට පෙර චීනයේ මූල්‍ය ක්‍ෂේත්‍රයේ බලධාරීන් සහ ජැක් මා අතර ගැටුම්කාරී තත්ත්වයක් පැන නැගිණි. ඒ, ජැක් එරට මූල්‍ය රෙගුලාසි විවේචනය කිරීමත් සමගිනි. එය බලධාරීන්ගේ සතුටට හේතු නොවූ බව පෙනිණි. ඊට ප්‍රතිචාර දක්වමින් අලිබාබා සමාගම පිළිබඳ විමර්ශනයක් ආරම්භ කිරීමට පවා ඔවුහු පියවර ගත්හ. මෙම ගැටුම් ඉදිරියට යද්දී පසුගිය වසරේදී ජැක් මා ටික කලක් සම්පූර්ණයෙන්ම අතුරුදන් වී සිටියේය.
‘මෙපමණ කලක් ව්‍යාපාර වෙනුවෙන් වෙහෙස වීමෙන් පසු දැන් ජැක්ට වුවමනා වී ඇත්තේ ඔහු කරන්නට ආසාවෙන් සිටි වෙනත් කටයුතුවල නිරත වීමටයි.’
යැයි ජෝ ට්සායි තවදුරටත් සඳහන් කර තිබේ.
‘ඔහු ගේ විනෝදාංශ සහ සමාජ සේවා කටයුතු වෙනුවෙන් වැඩි කාලයක් යෙදවීමට ඔහු බලාපොරොත්තු වෙනවා’
යැයිද ඔහු පවසා තිබිණි.
