තෛපොංගල් උත්සවයට පෙර පැවැත්වෙන හින්දු සංස්කෘතික උත්සව අතරින් ඉන්දියාවේ සුප්‍රසිද්ධ ජල්ලි කට්ටු ක්‍රීඩාව මේ වසරේ ශ්‍රී ලංකාවේ ද පළමුවරට පවත්වා තිබෙන බව නැගෙනහිර පළාතෙන් වාර්තා වෙනවා.
ඒ නැගෙනහිර පළාත් ආණ්ඩුකාර සෙන්තිල් තොන්ඩමන්ගේ ප්‍රධානත්වයෙන්.
සංචාරක කර්යංශය විසින් සංවිධානය කර තිබූ මේ උත්සවය වෙනුවෙන් හීලෑ නොවූ ගවයින් 200 ක් සහ හීලෑ ගවයින් 100 ක් සහභාගි කරවා තිබෙනවා.
ජල්ලි කට්ටු උත්සවයේ විශේෂතම අවස්ථාව ලෙස හදුන්වන මෙය ක්‍රීඩාවක්. මෙහි ක්‍රීඩකයින් වෙන්නේ ගවයින්. ගොන් පොර ක්‍රීඩාවට සමාන මේ ක්‍රීඩාවේදී සිදුවන්නේ ශක්ති සම්පන්න පුද්ගලයෙක් ගවයෙකු සමග පොර බැද ගවයා පරාජයට පත් කිරීම. ඒ වගේම මෙහිදී ගවයාගේ මොල්ලිය සෙලවිය නොහැකි වන ආකාරයට තදින් අල්ලාගන උගේ පිට මත නැගී ගවයා බිමට පෙරලා පොළවට තබා තද කිරීමෙන් ගවයා මෙල්ල කරනු ලබනවා.
ජල්ලි කට්ටු ක්‍රීඩාව වඩාත් ප්‍රසිද්ධියට පත්ව තිබෙන්නේ තමිල්නාඩුවේ. තෛපොංගල් උත්සවයට සතියකට පමණ පෙර පටන් ගන්නා ජල්ලි කට්ටු උත්සවය වෙනුවෙන් තමිල්නාඩුව වසරකට ගවයින් 2000 ක් 3000 ක් ක් පමණ සූදානම් කරනවා.
2008-2014 වසරවල තමිල්නාඩු ජල්ලි කට්ටු උත්සවවලදී අහිමි වුණු මිනිස් ජීවිත ගණන 43 ක් සහ ගවයින් ගණන් 20 ක් මිය යනු ලැබුවා. සදාකාලික ආබාධිත තත්වයට පත් වුණු මිනිසුන් ගණන 27 ක් සහ ගවයින් ගණන 200 ක් විතර වෙනවා කියලා තමිල්නාඩු මාධ්‍ය වාර්තා කර තිබෙනවා. ඉතිහාසයේ දැවැන්තම ජල්ලි කට්ටු උත්සවය පැවැත්වුණු 2017 වසරේ පමණක් මේ නිසා අහිමි වූ මිනිස් ජීවිත ගණන 27 ක් සහ තුවාල ලැබූ ගවයින් සංඛ්‍යාව 2500 ඉක්මවා තිබුණා.
මේ ක්‍රීඩාව සිදුවන අවස්ථාවේ දී ගවයින් මෙල්ල කිරීම අපහසු අවස්ථාවල ඔවුන්ට තියුණු කෙවිටිවලින් පහරදීම, වලිගය ඇඹරීම, ඇස්වලට මිරිස් කුඩු ඉසීම මෙන්ම පිහියෙන් ඇනීම පවා කරනු ලබනවා. නොඑසේ නම් ප්‍රකෝපකාරී ගවයින්ගෙන් ලේසියෙන් මිදී දිවි ගලවා ගන්නට මිනිසාට හැකිවෙන්නේ නැහැ. මෙවැනි හිංසන සිදුවන නිසාම ඉන්දීය සත්ව හිමිකම් සංවිධාන කීපයක් මේ ක්‍රීඩාවට එරෙහිව ඉන්දීය මහාධිකරණයේ නඩුවක් ගොනු කරනු ලැබුවා.
එහි ප්‍රතිඵලයක් ලෙස 2014 වසරේ දී ඉන්දීය මහාධිකරණය ජල්ලි කට්ටු තරග පැවැත්වීම තහනම් කළා. නමුත් මෙම තීන්දුවට එරෙහිව ඇපිල් නඩුවක් ගොනු කරමින් හින්දු භක්තිකයින් කියා සිටියේ හින්දු සංස්කෘතියේ සළකුණක් වන ජල්ලි කට්ටු ක්‍රීඩාව මෙසේ තහනම් කිරීම, සම්ප්‍රදාය අබිබවා යන්නක් බවයි.
ඒ වගේම එකී වසරවල ජල්ලි කට්ටු ක්‍රීඩාව නතර කර තිබුණේ පවා නැහැ. වසර ගණනාවක් පුරා විභාග කෙරුණු මෙම නඩුව 2023 වසරේ දී තීන්දුවකට පැමිණියා. ඒ අනුව කිසිදු සත්ව හිංසාවක් නොවන අයුරින් ජල්ලි කට්ටු ක්‍රීඩාව පැවැත්වීමට මහාධිකරණයෙන් අවසර ලැබී තිබුණා. නමුත් සත්ව හිංසාවක් සිදු නොවී මෙවැනි තරගයක් පවත්වන්නේ කෙසේද යන්න ගැටළුවක්.
ඉන්දියාව ඉවත් කරමින් සිටින විවිධ දේ ශ්‍රී ලංකාව විසින් ග්‍රහණය කර ගැනීමේ සම්ප්‍රදාය මෑතක සිට පැවතෙන්නක්. ඒ අනුව ශ්‍රී ලංකා අතීතයේ කිසිදු දිනක නොපැවැත්වූ ජල්ලි කට්ටු තරග, ඉන්දියාවෙන් ඉවත් කිරීමට වෙර දරමින් සිටින මොහොතේ එය ලංකාවේ සංස්කෘතියට එකතු කර ගැනීමට වෙර දරා ඇති ආකාරය තමයි පසුගිය සතියේ නැගෙනහිර ප්‍රදේශයෙන් අපට දැක ගන්නට ලැබී තිබුණේ.
