පසුගිය දිනක බුදුදහම සහා බුදුරජාණන්වහන්සේ ගැන ආන්දොලනාත්මක ප්රකාශයක් සිදුකල පාස්ටර් ජේරම්ගේ දෙමාපිය ඊයේ(18) දිනයේදි රාමඤ්ඤ මහා නිකායේ සංඝ මුලස්ථානයට පැමිණ ඕමල්පේ සෝභිත නායක ස්වාමීන් වහන්සේ බැහැදැක්ක තිබෙනවා.
පාස්ටර් ජේරම්ගෙන් ප්රකාශයෙන් බුදු දහමට බෞද්ධයන්ට සිදු වූ අගෞරව වෙනුවෙන් මහා සංඝරත්නය සහ සමස්ත බෞද්ධ සමාජයෙන් සමාව ඉල්ලීමට ඔවුන් මෙලෙස පැමිණ තිබුණා.
දෙපාර්ශවය අතර සුහද සාකච්ඡාවක් පැවති අතර අනතුරුව ඕමල්පේ සෝභිත හිමියන් මාධ්ය වෙත අදහස් පළ කර සිටියා.
වැරැද්ද තේරුම් අරගෙන ඒ පිළිබඳව සාකච්ඡාවකට පැමිණි සමාව ඉල්ලනවා නම් බෞද්ධ සමාජයක් හැටියට අපි සමාව දෙන්න සුදානම්. පළමු වටයේ සාකච්ඡාව සුහදශීලීව නිමා වුණා අපි බලාපොරොත්තු වෙනවා මේ සාකච්ඡාව ඉදිරියට අරන් යන්න.
පාස්ටර් ජෙරොම් ගේ මෑණියන් වන බෙවින් ප්රනාන්දු මහත්මිය මාධ්ය වෙත අදහස් පළ කරමින් කියා සිටියේ,
කෝටි වාරයක් අපි සමාව ඉල්ලනවා අපේ පුතාගේ වචනවලින් ලොකු කුඩා සියලු දෙනාටම හිත් රිදීමක් වුනානම් අපිට සමාවෙන්න.නායක ස්වාමීන් වහන්සේ අපිට මේ අවස්ථාව ලබා දීම ගොඩක් ස්තුතියි.
ආගමික අසමගිය ඇති කරන ආකාරයේ ප්රකාශයක් කළ බවට චෝදනා එල්ල වූ දේවගැති ජෙරම් ප්රනාන්දු විදෙස් ගමන් තහනමක් පනවා තිබෙන පසුබිමක මේ වන විට රටින් බැහැරව සිටින අතරම ජනාධිපතිවරයාගේ උපදෙස් පරිදි ඔහු කළ ප්රකාශය සම්බන්ධයෙන් අපරාධ පරීක්ෂණ දෙපාර්තමේන්තුව මේ වන විට පරීක්ෂණයක් සිදු කරගෙන යනවා.