අරලියගහ මන්දිරයේ සිට ගෝඨා ගෝ ගමට එල්ල කළ මැර ප්‍රහාරය සම්බන්ධයෙන්, කොළඹ කොටුව මහේස්ත්‍රාත් අධිකරණය විසින් හිටපු අමාත්‍ය ජොන්ස්ටන් ප්‍රනාන්දු සැකකරුවෙකු ලෙස නම් කර සතියක කාලයක් ගෙවී ගොස් ඇති නමුත්, මේ දක්වා ඔහු අත්අඩංගුවට ගැනීමට අපරාධ පරීක්ෂණ දෙපාර්තමේන්තුව අසමත් ව තිබේ.
මේ සම්බන්ධයෙන් ද මෝර්නිං වෙබ් අඩවිය පොලිස් මාධ්‍ය ප්‍රකාශකවරයාගෙන් විමසා ඇති අතර, ඔහු පවසා ඇත්තේ, සැකකරු සිටින ස්ථාන සොයා ගැනීමට නොහැකි වීම නිසා අත් අඩංගුවට ගැනීම මෙසේ ප්‍රමාද වනවා විය හැකි බවයි.
හිටපු අමාත්‍යවරයා සම්බන්ධයෙන් තොරතුරක් ඔහුගේ ආරක්ෂාවට යොමු කර සිටින ආරක්ෂක නිළධාරීන් හරහා ලබා ගැනීමේ හැකියාව පිළිබදව මෝර්නිං වෙබ් අඩවිය පොලිස් මාධ්‍ය ප්‍රකාශකවරයාගෙන් විමසා ඇති අතර, එහිදී ඔහු පවසා ඇත්තේ, ඇතැම් මැති ඇමතිවරු රජයෙන් ලබා දෙන ආරක්ෂාව ප්‍රතික්ෂේප කරන බවයි.
කෙසේ වෙතත්, මේ සම්බන්ධයෙන් අදාල වෙබ් අඩවිය ඇමති ආරක්ෂක අංශයෙන් විමසා ඇති අතර, ඔවුන් අනාවරණය කරගෙන ඇත්තේ තමන්ට ලබාදෙන ආරක්ෂාව හිටපු අමාත්‍ය ජොන්ස්ටන් ප්‍රනාන්දු මෙතෙක් ප්‍රතික්ෂේප කර නැති බවයි.
ඊට අමතරව, පාර්ලිමේන්තුව විසින් හිටපු අමාත්‍යවරයාට ලබා දී තිබෙන ජංගම දුරකථන අංකය, ඊයේ සන්ධ්‍යාව වන තුරුම ක්‍රියාත්මක තත්ත්වයේ පැවති බවද වෙබ් අඩවිය වාර්තා කරනවා.
