තමන් හා එකඟ නොවන අදහස් දරණ ජනමාධ්‍යවේදීන් අත්අඩංගුවට ගැනීම, පහරදීම හෝ අතුරුදන් කිරීම කිසිසේත්ම පිළිගත නොහැකි බව අන්තර්ජාතික ක්ෂමා සංවිධානය පවසයි.
එම සංවිධානය මේ බව ප්‍රකාශ කර ඇත්තේ පසුගියදා පාකිස්තානයේ ප්‍රකට මාධ්‍යවේදියකු වන ඉම්රාන් රියාෂ් ඛාන් අත්අඩංගුවට ගැනීම සම්බන්ධයෙන් විරෝධය පළකරමිනුයි.
එම සංවිධානය එරට රජයට ප්‍රකාශ කර ඇත්තේ පසුගිය කාලයේ දිගින් දිගටම ජනමාධ්‍ය වේදීන් අතුරුදන්වීම, පැහැර ගැනීම, පහර දීම හෝ බිය ගැන්වීම් සිදුවූ බවයි.
එම තත්ත්වය කිසිසේත් පිළිගත නොහැකි බවත් තමන් අනුමත නොකරන අදහස් ඇති කණ්ඩායම්වලට දඬුවම් කිරීම රජය විසින් වහා අත්හිටුවිය යුතු බවත් ඔවුන් පෙන්වා දෙයි.
එම සංවිධානය වැඩිදුරටත් පවසන්නේ ජනමාධයකරණය යනු අපරාධයක් නොවන බැවින් එම වෘත්තියේ නියැලෙන තැනැත්තන්ට අවශ්‍ය නිදහස ලබාදීම රජයේ වගකීමක් බවයි.
පසුගියදා අත්අඩංගුවට පත් ඉම්රාන් රියාෂ් ඛාන් යනු එරට ජනප්‍රිය ප්‍රවෘත්ති නිවේදකයකු වන අතර පසුගිය අඟහරුවාදා ඔහුව අත්අඩංගුවට ගෙන තිබුණේ ඉස්ලාමාබාද් නගරයට ආසන්නයේදීයි.
මෙලෙස ඔහු අත්අඩංගුවට ගෙන ඇත්තේ රාජද්‍රෝහී චෝදනා යටතේයි.
ඒ හේතුවෙන් ඔහුගේ ජීවිතය අනතුරුදායක තත්ත්වයකට පත්ව ඇති බවයි විදෙස් පුවත් සේවා වැඩිදුරටත් සඳහන් කරයි.
