පිළිමයෙන් පිටුදකින න්‍යායෙන් ආණ්ඩුවත් විපක්ෂයත් කටයුතු කළහොත් කොරෝනා වසංගතය හමුවෙහි රට අර්බුදයකට යනු ඇතැයි කැලණිය විශ්ව විද්‍යාලයේ පාලි හා බෞද්ධ පශ්චාත් උපාධි ආයතනයේ අධ්‍යක්ෂ මහාචාර්ය කොටපිටියේ රාහුල කෝට්ටේ ශ්‍රී කල්‍යාණී ධර්ම මහා සංඝ සභාවේ අනුනාහිමියෝ පවසති.
රටවැසියන්ගේ ආරක්ෂාව වෙනුවෙන් කැපවීමේ ප්‍රධාන වගකීම ආණ්ඩුවට පැවැරී ඇතැයි ද සාම්ප්‍රදායික සතුරු ආකල්පයෙන් මිදී දෙපක්ෂයම කටයුතු කළ යුතු යැයි ද කොටපිටියේ රාහුල අනුනාහිමියෝ පවසති.
ඖෂධ කෝටාව තමන්ගේ කෙනෙකුට දීම වැනි ක්‍රියාවන්ගෙන් වැලැකී විපක්ෂයේ සිටින පළපුරුදු නායකයන්ගෙන් වැඩක් ගැනීමට ආණ්ඩුව සිතිය යුතු යැයි උන්වහන්සේ සඳහන් කළ බව ‘ලංකාදීප’ පුවත්පතේ සඳහන් වේ.
විපක්ෂයෙන් අපේක්ෂා කරන්නේ රජය ගන්නා සාධනීය පියවර අගය කරමින් වැරැදි දේට සාධනීය විවේචන කිරීම වුවත් වත්මන් විපක්ෂයත් පෙර පැවැති විපක්ෂ මෙන්ම අන්තවාදී වී ඇතැයි උන්වහන්සේ චෝදනා කර ඇත.
විපක්ෂය යනු බලය ඩැහැගැනීමට හැමදේටම විරුද්ධ වීමේ පක්ෂයක් නොවී ප්‍රතිපක්ෂයක් විය යුතු යැයි ද දැනුම හා ක්‍රියාකාරිත්වයෙන් විපක්ෂයට වැඩ විශාල කොටසක් කළ හැකි යැයි ද රාහුල අනුනාහිමියෝ පවසති.
ජනතා බලය නැති වුණත් ඔවුන්ගෙන් වැඩක් ගැනීමට ආණ්ඩුවකට හැකි නමුත් මේ දෙපාර්ශ්වයම සාම්ප්‍රදායික දේශපාලනයෙහි නියැලී සිටීම රටේ අවාසනාවක් යැයි ද රාහුල අනුනාහිමියෝ වැඩිදුරටත් සඳහන් කරති.
