ලෙබනන් විරෝධතාකරුවන් පිරිසක් ඊයේ (16) බේරූට්හි වාණිජ බැංකු කඩා ගිනි තැබූ අතර, වසර ගණනාවක් තිස්සේ ක්‍රියාත්මක වූ මුදල් ආපසු ගැනීම් සඳහා ඇති අවිධිමත් සීමා කිරීම්වලට සහ වේගයෙන් පිරිහෙන ආර්ථික තත්වයන්ට එරෙහිව මාර්ග අවහිර කළහ.
ඊයේ දිනයේදී ලෙබනන් පවුම නව වාර්තාගත අවම මට්ටමකට පැමිණීමත් සමඟ බැංකු 6ක් පමණ ඉලක්ක කර මෙම ප්‍රහාරය සිදු විය.
2019 සිට, ලෙබනන් බැංකු විසින් ඇමරිකානු ඩොලර් සහ ලෙබනන් පවුම් මුදල් ආපසු ගැනීම සඳහා සීමාවන් පනවා ඇති අතර, තැන්පතුකරුවන්ට බොහෝවිට සිදුවූයේ නඩුමාර්ගයෙන් හෝ බලහත්කාරයෙන් සිය මුදල් ආපසු ගැනීමටයි
2019 දී රටේ මූල්‍ය අංශයේ සිදුවූ දැවැන්ත පසුබෑමත් සමඟ ලෙබනන් පවුමේ වටිනාකමෙන් සියයට 98 කට වඩා අහිමි වී ඇත. ලෙබනනයේ අග්‍රාමාත්‍ය කාර්යාලය පවසන්නේ රටේ මූල්‍ය තත්වයන්ට පිළියම් යෙදීමේ කටයුතු සිදුවෙමින් පවතින බවයි.
ලෙබනනය 2022 අප්‍රේල් මාසයේදී ජාත්‍යන්තර මූල්‍ය අරමුදලෙන් (IMF) සහනයක් ලබා ගැනීම සඳහා පළමු පියවර තැබූ නමුත්, වසරකට ආසන්න කාලයකට පසුවත්, එය අවසන් කිරීමට අවශ්‍ය ප්‍රතිසංස්කරණ සිදු කිරීමට අපොහොසත් වී ඇත.
