චීනයේ තුන්වන වඩාත්ම ජනාකීර්ණ පළාත වන හෙනාන්හි වැසියන්ගෙන් 90% කට ආසන්න ප්‍රමාණයක් මේ වන විට කොවිඩ් -19 වෛරසය ආසාදනය වී ඇති බව අනාවරණය වේ.
මධ්‍යම හෙනාන් පළාතේ සෞඛ්‍ය කොමිසමේ අධ්‍යක්ෂවරයා ජනමාධ්‍ය හමුවකදී අනාවරණය කර ඇත්තේ 2023 ජනවාරි 06 වැනිදා වන විට පළාතේ කොවිඩ් ආසාදන අනුපාතය 89% ක් බවයි.
සංඛ්‍යාලේඛනවලට අනුව හෙනාන්හි ජනගහනය මිලියන 99.4කි. ඒ අනුව එම පිරිසෙන් මිලියන 88.5 ක පමණ ජනතාවක් දැන් ආසාදිතයන් බවට පත්ව තිබේ.
පළාතේ සෞඛ්‍ය කොමිසමේ අධ්‍යක්ෂවරයාට අනුව පළාතේ උණ සායන වෙත රෝගීන් පැමිණීම පසුගිය දෙසැම්බර් 19 වන දින උපරිමයට පත් වී ඇත.
රට තුල පැනනැගුණු ඓතිහාසික විරෝධතා රැල්ලකින් පසුව, පසුගියදා චීනයේ දේශසීමා විවෘත කිරීම රටේ ශුන්‍ය-කොවිඩ් නීති අවසන් කිරීමේ අවසාන පියවර වූ අතර එය විශාල කොවිඩ් ආසාදන රැල්ලකට තුඩු දී ඇත.
මේ මස අගදී චීනය නව වසර සමරන විට කොවිඩ් රෝගීන් තවත් ඉහළ යනු ඇතැයි අපේක්ෂා කෙරේ.
ලෝක සෞඛ්‍ය සංවිධානය පවසා ඇත්තේ චීනය රෝගීන් සංඛ්‍යාව අඩුවෙන් වාර්තා කරන බවයි. අන්තර්ජාතික සෞඛ්‍ය විශේෂඥයින් ඇස්තමේන්තු කර ඇති ආකාරයට රටේ මිලියනයකට වැඩි පිරිසක් මෙම වසරේදී කොවිඩ් ආසදිතව මිය යා හැකි බවටය.
