ශ්‍රී ලංකාවේ ජාතික ධජය ඇතුළත් කර නිෂ්පාදනය කරන ලද, ‘Sri Lanka Flag Non-Slip Doormat’ ලෙසින් Amazon වෙබ් අඩවිය හරහා මිලදී ගැනීමට තිබූ පාපිස්නාවක් පිළිබඳව පසුගිය දින කිහිපයෙහි දැඩි කතාබහකට ලක්වුණා.
විදේශ කටයුතු අමාත්‍යංශය පැවසුවේ අදාල පාපිස්නාව Amozon වෙබ් අඩවිය හරහා අලෙවි කිරීමට කටයුතු කර ඇත්තේ චීනයේ නිෂ්පාදකයෙක් බවයි.
ඒ අනුව ශ්‍රී ලංකාවේ ජාතික ධජය පාපිස්නාවක් ලෙසින් දැක්වෙන වෙළෙඳ දැන්වීම සම්බන්ධයෙන්, චීනයේ අදාළ නිෂ්පාදකවරයා සම්බන්ධ කර ගන්නා ලෙසට බීජිං හි ශ්‍රී ලංකා තානාපති කාර්යාලය වෙත දැනුම් දී ඇති විදේශ ලේකම් අද්මිරාල් මහාචාර්ය ජයනාත් කොළඹගේ මහතා, ඒ පිළිබඳව කොළඹ පිහිටි චීන තානාපති කාර්යාලයේ අවධානයද යොමු කර තිබෙනවා.
එමෙන්ම, ඇමසෝන් හි වෙළෙඳ ප්‍රචාරණ වෙබ් අඩවිය සමග මෙම කාරණය පිළිබඳ පසු විපරමක් සිදු කරන ලෙසට වොෂිංටන් හි පිහිටි ශ්‍රී ලංකා තානාපති කාර්යාලයට ද උපදෙස් ලබාදුන් බවද වාර්තා වනවා.
මේ අතර චීනයේ ශ්‍රී ලංකා තානාපති කාර්යාලය අද (13) නිවේදනය කළේ ශ්‍රී ලංකාව චීනයෙන් කළ ඉල්ලීමට අනුව ශ්‍රී ලංකා ධජය සහිත පාපිසි අලෙවි කිරීමට ඇති දැන්වීම සිය වෙබ් අඩවියෙන් ඉවත් කිරීමට Amozon ආයතනය කටයුතු කර ඇති බවයි.
මේ අතර චීන තානාපති කාර්යාලය නිවේදනය කරන්නේ ඕනෑම රට ජාතික ධජය එරට සංකේතයක් බව චීනයේ ස්ථාවරය බවත් එයට සම්පූර්ණයෙන්ම ගරු කළ යුතු බවත්ය.
අදාල සිදුවීම පිළිබඳව විමර්ශනය කිරීම හා ඒ අනුව අවශ්‍ය පියවර ගැනීම සඳහා අදාළ චීන බලධාරීන් වෙත දැනුම් දී ඇති බවත් විවිධ රටවල වෙළෙන්දන් විසින් නිෂ්පාදනය කරනු ලබන විවිධ ජාතීන්ගේ ධජ සහිත සමාන නිෂ්පාදන දහස් ගණනක් ඇමසන් වෙබ් අඩවිය හරහා ලබාගත හැකි බවද තානාපති කාර්යාලය පවසයි.
ද්විපාර්ශ්වික ක්‍ෂේත්‍රවල හෝ ජාත්‍යන්තර වේදිකාවලදී කුමක් වුවත්, දශක ගණනාවක් තිස්සේ චීනය ශ්‍රී ලංකාවේ සාමය, සමෘද්ධිය සහ ගෞරවය වෙනුවෙන් ගරු කරමින් සහයෝගය ලබා දී ඇති බවද චීන තානාපති කාර්යාලය වැඩිදුරටත් අවධාරණය කරනවා.
