අල්ලස් චෝදනාවක් සම්බන්ධයෙන් වරදකරුවෙකු වී සිර දඬුවම් ලබමින් සිටින, හිටපු ජනාධිපති මෛත්‍රීපාල සිරිසේන මහතාගේ හිටපු කාර්ය මණ්ඩල ප්‍රධානී අයි. එච්. කේ. මහානාම මෝසමක් මාර්ගයෙන් ඉදිරිපත් කර තිබූ ඇප ඉල්ලීම පිළිබඳව තීන්දුව නොවැම්බර් 25 දින ප්‍රකාශ කරන බව කොළඹ ත්‍රිපුද්ගල විශේෂ මහාධිකරණය දැනුම්දී ඇත.
අද නඩුව නොවැම්බර් 18 දින අධිකරණයේදී කැඳවිය.
මේ වන විට බන්ධනාගාරය තුළ කොවිඩ් වෛරසය ආසාදනය වූ පුද්ගලයින් හඳුනාගෙන ඇති බවත් තම සේවාදායකයා හෘද රෝගියෙකු වන බැවින් ඔහු, එම බන්ධනාගාරයේ තවදුරටත් රැඳී සිටියහොත් ඔහුගේ ජීවිතයට පවා අනතුරක් සිදුවීමට ඉඩකඩ පවතින බව මහානාම මහතා වෙනුවෙන් පෙනී සිටි ජනාධිපති නීතිඥ අනිල් සිල්වා මහතා අධිකරණය හමුවේ කරුණු දක්වා ඇත. ඒම කාරණාව සලකා බලමින් තම සේවාදායකයා ඇපමත මුදා හැරීමේ නියෝගයක් නිකුත් කරන ලෙසත් අනිල් සිල්වා මහතා අධිකරණයෙන් ඉල්ලා ඇත.
කෙසේ වෙතත් මහනාම මහතාට ඇප ඉල්ලීම විභාග කිරීමට ත්‍රිපුද්ගල මහාධිකරණයට බලයක් ඇතිදැයි යන්න පිළිබඳව ප්‍රශ්නයක් ඇති බවත් රජයේ නීතිඥවරයා සිදු කළ කරුණු දැක්වීමත් සලකා බලමින් විනිසුරු මඬුල්ල ඒ පිළිබඳ තීන්දුව ලබන 25 ප්‍රකාශයට පත්කරන බව නිවේදනය කර ඇත.
