මහර බන්ධනාගාරයේ කොවිඞ් වයිරසය පැතිර යාමෙන් පසුව රාජකාරියේ නියුතු නියාමකයන් සියලු දෙනාටම පී.සී.ආර් පරීක්ෂාවක් නොකිරීම නිසා ඔවුන් දැඩි අපහසුතාවකට පත්ව සිටිතැයි එහි අභ්‍යන්තර ආරංචි මාර්ග සඳහන් කරයි.
එකවර පී.සී.ආර් පරීක්ෂාවක් නොකොට දැනට කීපදෙනා බැගින් පරීක්ෂාවට ලක්කරමින් ඇතැයි ද එහිදී ආසාදිත බවට තහවුරු වන අනුපිළිවෙලට එකිනෙකා නිරෝධායන මධ්‍යස්ථාන කරා යොමුකරමින් ඇතැයි එහි ප්‍රකාශකයෙක් ‘නිව්ස් 19’ ට පැවැසීය.
මේ සම්බන්ධයෙන් බන්ධනාගාර අධිකාරිවරයාට නියාමකවරුන් අවස්ථා ගණනාවකදීම පැමිණිලි කළත් ඔහු එකවර පී.සී.ආර් පරීක්ෂාවක් කිරීම ප්‍රතික්ෂේප කර ඇත්තේ සියලු දෙනා ආසාදිතයන් බවට වාර්තා වුවහොත් රාජකාරි කිරීමට ශ්‍රම බලයක් නැතැයි කියමිනි.
බන්ධනාගාර අධිකාරිවරයා නියාමකයන්ට වැඩිදුරටත් පවසා ඇත්තේ ප්‍රතිශක්තිය වර්ධනය කරගැනීම සඳහා හෙළ වෛද්‍යවරයකු නිපදවා ඇතැයි කියන පැණියක් ඇණවුම් කර ඇති බවත් නියාමකයන්ට එය ලබාදෙන බවත්ය.
මේ වනවිට නියාමකයන් බොහෝ දෙනකු කොරෝනා රෝග ලක්ෂණ පහළ කරමින් සිටින්නේ යැයි ද අදාළ කාරණය රජයේ වෛද්‍ය නිලධාරින්ගේ සංගමට ද පැමිණිලි කර ඇතැයි ද වාර්තා වේ.
