අග්‍රාමාත්‍ය මහින්ද රාජපක්ෂ මහතා අද (29) පෙරවරුවේ උස්වැටකෙයියාව මුහුදු තීරයේ නිරීක්ෂණ චාරිකාවක නිරතව තිබේ.
ඒ “එම්.වී.එක්ස්ප්‍රස් පර්ල්“ නෞකාවේ ඇතිවූ ගින්නෙන් සමුද්‍රීය පරිසරයට සිදුවන හානිය අවම කිරීමට ගෙන ඇති ක්‍රියාමාර්ග සොයා බැලීමට බවයි අග්‍රාමාත්‍ය මාධ්‍ය ඒකකය සඳහන් කර සිටින්නේ,.
ගින්නෙන් දෛනික ධීවර කටයුතු අහිමි වූ ධීවරයන්ට සහන සැලසීම කඩිනම් කරන ලෙස අගමැතිවරයා එහිදී උපදෙස් ලබා දී තිබේ.
මෙම අවස්ථාවට අමාත්‍ය ප්‍රසන්න රණතුංග, රාජ්‍ය අමාත්‍යවරුන්වන නාලක ගොඩහේවා, කංචන විජේසේකර, නාවික හමුදාපති වයිස් අද්මිරාල් නිශාන්ත උළුගෙතැන්න, නාගරික සංවර්ධන අමාත්‍යාංශයේ ලේකම් සිරිනිමල් පෙරේරා, නාගරික සංවර්ධන අධිකාරියේ සභාපති හර්ෂාන් ද සිල්වා, අධ්‍යක්ෂ ජනරාල් ප්‍රසාද් රණවීර, සමුද්‍රීය පරිසර ආරක්ෂණ අධිකාරියේ සභාපති දර්ශනී ලහදපුර මහත්ම මහත්මීන් ඇතුළු රාජ්‍ය නිලධාරින් පිරිසක් එක්ව සිටියහ.
මේ අතර, එලෙස ගිනිගැනීමට ලක් වූ නෞකාව හේතුවෙන් මුහුදු ජලය, මුහුද පතුල මෙන්ම වෙරළ කළාපය විනාශ වී ඇති බවට නිරීක්ෂණය වන බව සමුද්‍රීය පරිසර ආරක්ෂණ අධිකාරිය පවසයි. කොළඹ වරාය ආසන්නයේ ගිනිගැනීමට ලක් වූ නෞකාවේ ගින්න මේවන විට බොහෝ දුරට පාලනය කර තිබේ. ඒ, වරාය අධිකාරිය, ශ්‍රී ලංකා නාවික හමුදාව සහ ශ්‍රී ලංකා ගුවන් හමුදාව විසින් ඉන්දීය වෙරළ ආරක්ෂක යත්‍රාවල ද සහාය ඇතිවය.
ඒ අනුව නෞකාව සිසිලනය කිරීම්මේ කටයුතු තවදුරටත් සිදුකරමින් පවතී.
